रायपुर, 07 सितमबर 2020। प्रदेश म काली 7 सितंबर ले आंगनबाड़ी केन्द्र मन के संचालन शुरू हो गीस। पालक, पंचायत अऊ नगरीय निकाय के प्रतिनिधि मन ले चर्चा अऊ सहमति ले कई आंगनबाड़ी भवन मन म गर्भवती अऊ एनिमिक महिला मन अऊ आंगनबाड़ी केन्द्र मन के 3 ले 6 साल के आयु के लइका मन ल गरम भोजन खवाए गीस। ये दौरान राज्य शासन कोति ले देहे गये निर्देशानुसार कोरोना संक्रमण ले बचाव बर जरूरी प्रबंध करे गीस। स्थानीय प्रशासन के निर्णय के मुताबिक कोविद संक्रमण ल देखत कंटेंटमेंट जोन अऊ असहमति वाले केंद्र मन ल बंद रखे गीस।
जानबा हे के प्रदेश म महिला अऊ बाल विकास विभाग ह कुपोषण उपर विशेष ध्यान देवत हे। आंगनबाड़ी केन्द्र के कार्यकर्ता मन ल कोविड-19 के संक्रमण ल दृष्टिगत रखत लइका मन के बैठक व्यवस्था म सोशल डिस्टेंसिंग के पालन करे अऊ आन सबो जरूरी सावधानी बरते के निर्देश देहे गे हे। लइका मन के स्वास्थ्य अऊ भोजन उपर विशेष ध्यान रखे के निर्देश घलोक देहे गये हे।
