प्रधानमंत्री सूर्यघर योजना: अंजोर बगराए के संग आत्मनिर्भरता के रद्दा देखावत हे श्री भात्रा

’बिजली उपभोक्ता ले उत्पादक बनिस, ऊर्जा आत्मनिर्भरता कोति बढ़त छत्तीसगढ़’
कोरबा, भारत के विकास के रद्दा अब सूरज के अंजोर ले जगमगावत हे। इही दिशा म प्रधानमंत्री सूर्यघर मुफ्त बिजली योजना ह ऊर्जा आत्मनिर्भरता के नवा परिभासा गढ़े हे। ये योजना बिजली बचत के उपाय के संग हर घर ल भविष्य के ऊर्जा क्रांति ले जोड़इया पुलिया बन गए हे। प्रधानमंत्री श्री नरेंद्र मोदी के दूरदर्शी अगुवई म शुरू होए ये पहल नागरिक मन ल उपभोक्ता ले उत्पादक बनावत हे। अब हर छत सिरिफ छत भर न ही, भलुक ऊर्जा के स्रोत हे। येकरे सेती सूर्यघर योजना आज स्वच्छ ऊर्जा, आत्मनिर्भरता अऊ सतत विकास के सबले मजबूत आधार स्तंभ बन गे हे।
कोरबा जिला के खरमोरा के रहवइया श्री दीपक किशोर भात्रा, जेन पेशा ले व्यापारी हे, वो ह अपन घर के छत म तीन किलोवाट के सोलर पैनल लगवाए हे। ओ ल ए योजना के जानकारी अपन चिन्‍ह पहिचान मन ले मिलीस, योजना के लाभ सुनतेच वो ह बिना देर करे आधिकारिक वेबसाइट के माध्यम ले आवेदन करिस। आवेदन के तुरंत बाद ही विशेषज्ञ टीम ह वोखर घर म सोलर पैनल स्थापित कर दीस। आवेदन के कुछेक दिन म वोखर खाता म केंद्र सरकार कोति ले 78 हजार रूपिया के सब्सिडी सीधा जमा हो गे। एखर से ओ ल आर्थिक बोझ महसूस नइ होइस। अब वोखर घर के सबो उपकरण बिना कोनो रुकावट के आसानी ले चलत हे।
श्री भात्रा बतात हे के सोलर पैनल के कुल लागत लगभग 2 लाख 10 हजार आए हे, फेर सरकार के सब्सिडी मिले ले ओखर सही निवेश अड़बड़ कम हो गए हे। ओखर कहना हे के आज जेमां अधिकांश मनखे कोयला अऊ आन पारंपरिक साधन मन उपर निर्भर हे, उहें सूर्यघर योजना एक क्रांतिकारी पहल हे। ये योजना हर घर म बिजली के आपूर्ति ठउका करत हे अऊ संगेच बचत के अवसर घलोक देवत हे। केवल एक पइत के निवेश जीवनभर के अंजोर अऊ आत्मनिर्भरता के आशीर्वाद लेके आवत हे। श्री भात्रा ह प्रधानमंत्री श्री नरेंद्र मोदी अऊ मुख्यमंत्री श्री विष्णु देव साय के प्रति आभार जतात कहिस के ये पहल सही म आम मनखे मन के जीवन म अंजोर अऊ समृद्धि लेके आए हे।