रायपुर, मुख्यमंत्री श्री भूपेश बघेल ह काली संझा राजनांदगांव सर्किट हाउस म कई ठन समाज अऊ सामाजिक संगठन के प्रतिनिधि मण्डल ले भेंट-मुलाकात करिन। मुख्यमंत्री ह ये मौका म एक-एक करके सबो समाज अऊ संगठन के प्रतिनिधि मन ले सामाजिक गतिविधि मन के संबंध म जानकारी लेहे के संग उंखर मन ले शासकीय योजना अऊ कार्यक्रम मन के क्रियान्वयन के संबंध म घलोक फीडबैक लीन।
मुख्यमंत्री ह आदिवासी समाज के मांग म फरहद चौक म शहीद वीर नारायण सिंह के मूर्ति स्थापना के घोषणा के संग चौक के सौंदर्यीकरण के स्वीकृति प्रदान करिन। धोबी समाज के प्रतिनिधि मन ह रजक कल्याण बोर्ड बनाए बर मुख्यमंत्री के प्रति आभार व्यक्त करिन। मुख्यमंत्री ह कई ठन सामाजिक संगठन मन के प्रतिनिधि मन ले कहिन कि पहिली खुद के नाम म जमीन के रजिस्ट्री करव। जेखर से सामाजिक भवन बर राशि स्वीकृत करे जा सकय। आदिवासी कंवर समाज के सामाजिक भवन विस्तार के मांग म मुख्यमंत्री ह कहिन कि समाज के जमीन होए म राशि देहे जाही।
मुख्यमंत्री श्री बघेल ले राजनांदगांव म सामाजिक संगठन ले मुलाकात के बेरा म मुस्लिम तेली समाज म जाति प्रमाण-पत्र बनाए म आवत कठिनाई ले अवगत कराइन मुख्यमंत्री ह कहिन कि नगर निगम या ग्राम सभा ले प्रस्ताव पारित करावव। अइसनहे बौद्ध समाज के प्रतिनिधि मन ह घलोक जाति प्रमाण-पत्र बनाए म आवत दिक्कत ले अवगत कराइन। ये संबंध म अनुविभागीय अधिकारी राजस्व ह प्रतिनिधिमंडल ल जाति प्रमाण-पत्र बनाए के नियम अऊ प्रक्रिया ले अवगत कराइस।
मुख्यमंत्री श्री भूपेश बघेल ह कई ठन समाज के मांग म सामाजिक भवन अऊ आन काम मन बर करीबन 2 करोड़ 35 लाख रूपिया के मंजूरी प्रदान करिन। उमन निषाद समाज ल छात्रावास निर्माण बर 25 लाख रूपिया, प्रजापति ब्रम्हकुमारी ईश्वरीय विश्वविद्यालय लालबाग राजनांदगांव ल 25 लाख रूपिया, सामाजिक भवन निर्माण बर राजपूत क्षत्रिय समाज ल 30 लाख रूपिया, महाराष्ट्रीयन तेली समाज ल 20 लाख रूपिया, कायस्थ समाज ल 20 लाख रूपिया, मुस्लिम समाज ल 20 लाख रूपिया, कच्छ गुर्जर समाज ल 20 लाख रूपिया, मारवाड़ी समाज ल 20 लाख रूपिया, ठेठवार समाज ल 20 लाख रूपिया, चन्द्राकर समाज ग्राम जंगलेश्वर ल 20 लाख रूपिया देहे के घोषणा करिन। अइसनहे गुजराती समाज ल 15 लाख रूपिया, स्वीकृत करे के घोषणा करिन। एखर अलावा मसीही समाज ल कब्रिस्तान म बाउण्ड्रीवाल निर्माण के स्वीकृति प्रदान करिन।
फरहद चौक म होही शहीद वीर नारायण सिंह के मूर्ति के स्थापना: मुख्यमंत्री श्री बघेल
