बालोद, 31 जनवरी 2024। संयुक्त जिला कार्यालय के जनदर्शन कक्ष म काली आयोजित कलेक्टर जनदर्शन कार्यक्रम जिला के दिव्यांग युवक मनोहर भेड़िया अउ श्रवणबाधित बालक नितिन बर राहत भरे साबित होइस। जानबा हे कि अपन दिव्यांगता के कारण चले-फिरे म होवत परेशानी मन के चलते जिला के गुण्डरदेही विकासखण्ड के ग्राम गब्दी के दिव्यांग युवक मनोहर भेड़िया ह बैसाखी के मांग करे बर जनदर्शन कार्यक्रम म आज कलेक्टर श्री इन्द्रजीत सिंह चन्द्रवाल ले मुलाकात करे पहुँचे रहिस। कलेक्टर श्री चन्द्रवाल ह जनदर्शन म पहुँचे दिव्यांग युवक मनोहर भेड़िया ले बातचीत करके वोखर मांग अउ समस्या मन के संबंध म जानकारी लीन। दिव्यांग मनोहर ह चले-फिरे म सहुलियत बर बैसाखी के मांग करिस त कलेक्टर श्री चन्द्रवाल ह समाज कल्याण विभाग के अधिकारी मन ल तलब करके दिव्यांग मनोहर भेड़िया ल तुरंते बैसाखी प्रदान कराए के निर्देश दीन। एखर अलावा चन्द्रवाल ह समाज कल्याण विभाग के अधिकारी मन ल दिव्यांग श्री मनोहर भेड़िया ल कृत्रिम पैर प्रदान करे बर ऊंखर पैर के नाप लेहे के निर्देश दीन। कलेक्टर के निर्देश म दिव्यांग मनोहर ल जनदर्शन कक्ष म ही बैसाखी प्रदान करे गीस। अइसनहे जनदर्शन म आज जिला मुख्यालय बालोद के कुर्मीपारा निवासी श्रवणबाधित बालक नितिन अउ वोखर पिता श्री महेश कुमार ह श्रवण यंत्र के मांग बर कलेक्टर श्री चन्द्रवाल ले मुलाकात करे पहुँचे रहिन। कलेक्टर श्री चन्द्रवाल ह श्रवणबाधित बालक अउ वोखर पिता ले बातचीत करके उंखर हालचाल जानिन। श्रवणबाधित बालक के पिता के संग श्रवण यंत्र के मांग म समाज कल्याण विभाग के अधिकारी मन ल कलेक्टर सहेब ह तलब करके दिव्यांग बालक नितिन ल तुरंते श्रवण यंत्र प्रदान करे के निर्देश दीन। कलेक्टर के जल्दी कार्रवाई के फलस्वरूप तुरंत बैसाखी अउ श्रवण यंत्र मिले ले दिव्यांग मनोहर अउ श्रवणबाधित बालक नितिन बहुतेच प्रसन्नचित नजर आत रहिन।
बालोद: जनदर्शन म आज दिव्यांग मनोहर भेड़िया ल मिलीस बैसाखी अउ श्रवणबाधित बालक नितिन ल मिलीस श्रवण यंत्र
