बेमेतरा म आंगनबाड़ी कार्यकर्ता मन हितग्राही मन ल घर-घर जाके बांट हें रेडी टू ईट अउ सूखा राशन

बेमेतरा 22 अप्रैल 2020। महिला अउ बाल विकास विभाग कोति ले महिला मन अउ लइका मन के स्वास्थ म सुधार लाय के दिशा म विशेष प्रयास करे जात हे। बेमेतरा जिला म संचालित 1079 आंगनबाड़ी केन्द्र के हितग्राही मन ल घर-घर जाके आंगनबाड़ी कार्यकर्ता मन ह रेडी टू ईट (टी.एच.आर.) बांटत हें। 06 महिना ले 03 साल तक के 38833 हितग्राही अउ 03 ले 06 साल के 32224 हितग्राही, गर्भवती माता 7138, शिशुवती माता 7890, किशोरी बालिका 202, कुल 86287 हितग्राही मन ल रेडी टू ईट कोति ले लाभांवित करे गए हे। एखरे संग आंगनबाड़ी कार्यकर्ता मन घर म रेडी टू ईट दे के संग गृह भेंट के माध्यम ले कोरोना वायरस के संक्रमण के रोकथाम अउ फैलाव ले बचाव बर समझाईश घलोक देहे जात हे, जइसे घर म ही रहना, भीड़ वाले जगा म नइ जाना, माक्स के उपयोग करना, बेरा-बेरा म घेरी-बेरी साबुन ले हाथ धोना अउ कहूं कोरोना वायरस के लक्षण मिलय त सीधा चिकित्सक ले परामर्श के संग स्वच्छता अउ साफ सफाई उपर विशेष ध्यान देना। कलेक्टर श्री शिव अनंत तायल के सियानी अउ जिला पंचायत मुख्य कार्यपालन अधिकारी श्रीमती रीता यादव के मार्गदर्शन म मुख्यमंत्री सुपोषण अभियान के तहत् प्रतिकात्मक रूप ले 75 आंगनबाड़ी केन्द्र के करीबन 1255 हितग्राही मन ल 06 महिना ले 03 साल के मध्यम गंभीर कुपोषित लइका अउ एनिमिक शिशुवती माता मन ल सुखा पोषण आहार (चावल, दाल, आलू, चना) देके लाभांवित करे गए हे।