मंत्री श्री बघेल ह रामायण मानस गायन मण्डली ल करिन सम्मानित

बेमेतरा, 23 जनवरी 2024। खाद्य नागरिक आपूर्ति अउ उपभोक्ता संरक्षण मंत्री श्री दयालदास बघेल पाछू दिनन बेमेतरा म जिला मुख्यालय के श्री राम मंदिर म दीपदान, गंगा आरती अऊ रामायण मानस गायन म सामिल होइन। जिला प्रशासन से कलाजत्था के माध्यम ले सबो विकासखण्ड मन म सांस्कृतिक कार्यक्रम के आयोजन करे गए रहिस। श्री बघेल ह भक्तिमय गीत मन के आनंद लीन। उमन कार्यक्रम म पंजीकृत त्रिवेणी संगम मानस मण्डली पिकरी अउ जय मां शीतला मानस मण्डली भिलौरी ल 5-5 हजार रूपिया प्रोत्साहन राशि देके सम्मानित करिन।
जिला प्रशासन कोति ले जिला मुख्यालय संग विकासखंड अऊ ग्राम पंचायत मन म नागरिक मन बर एलईडी टी.व्ही. अउ प्रोजेक्टर के माध्यम ले प्रसारण के व्यवस्था कराए गए रहिस। ए बेरा म विधायक श्री दीपेश साहू, कलेक्टर श्री रणबीर शर्मा, पुलिस अधीक्षक श्रीमती भावना गुप्ता अउ बड़ संख्या म श्रद्धालु उपस्थित रहिन।