रायपुर, वाणिज्य अउ उद्योग मंत्री अऊ धमतरी जिला के प्रभारी मंत्री श्री कवासी लखमा ह आज कुरूद विकासखण्ड के ग्राम दर्रा, सिलौटी अऊ सेमरा म कई ठन निर्माण काम मन के लोकार्पण करिस। उमन ग्राम सिलौटी म 24 लाख 50 हजार रूपिया ले बने चार काम अउ ग्राम सेमरा म 34 लाख 31 हजार रूपिया के चार काम मन के लोकार्पण करिन। ये बेरा म उमन कहिन कि मुख्यमंत्री श्री भूपेश बघेल के नेतृत्व म प्रदेश म असल म विकास होवत हे। किसान मन के कर्जमाफी, 2500 रूपिया म धान के खरीदी, बिजली बिल हाफ, नवा राशन कार्ड बनाए, शिक्षक मन के भर्ती जइसे ऐतिहासिक कदम शासन कोति ले उठाए गे हे। नरवा, गरवा, घुरवा, बाड़ी जइसे योजना मन ल लाके सरकार किसान मन ल आत्मनिर्भर बनाए के सरलग काम करत हे। उमन ग्राम दर्रा के गौठान म तियार करे के घलोक घोषणा करिन। श्री लखमा ह ग्राम सेमरा सि. म महिला अउ बाल विकास विभाग कोति ले आयोजित सुपोषण महिना के शुभारम्भ करिन।
मंत्री श्री लखमा ह कहिन किसानपुत्र मुख्यमंत्री ह हरेली, तीजा परब जइसे स्थानीय तिहार के महत्व ल समझत सार्वजनिक अवकाश घोषित करिन। श्री लखमा ह ग्राम सिलौटी म पांच लाख रूपिया ले निर्मित हाई स्कूल के अकतहा कुरिया, 19 लाख रूपिया ले निर्मित मराठा भवन, मानस भवन अऊ साहू भवन के लोकार्पण करिन। एखर अलावा कुरूद के पहिली विधायक श्री लेखराम साहू के मांग म उमन शासकीय नवीन महाविद्यालय सिलौटी म फर्नीचर अउ जरूरी सामान क्रय करे बर पांच लाख रूपिया के राशि के स्वीकृति दीन। एखर अलावा ग्राम सेमरा सि. म पांच लाख रूपिया के लागत ले निर्मित शासकीय नवीन प्राथमिक भवन म अकतहा कक्ष भवन, पांच लाख रूपिया ले प्राथमिक अउ मिडिल स्कूल खपरी म अहाता निर्माण अऊ ग्राम खपरी म 19 लाख 31 हजार रूपिया ले निर्मित स्टाॅप डैम के लोकार्पण करिन। ये बेरा म कलेक्टर श्री रजत बंसल अउ बड़ संख्या म नागरिक उपस्थित रहिन ।
