मनरेगा ले चिस्दा ल मिलीस नवा पंचायत भवन

बिलासपुर, गांव वाले मन कइ बछर ले सोंचत रहिन के उंखर खुद के पंचायत भवन बनय। ये सपना अब पूरा होए हे। ओ मन ल खुद के स्थायी पंचायत भवन मिल गए हे। जिहां ले गांव के योजना बनही अऊ विकास के दिशा तय होही। आज ये भवन केवल ईंट-पत्थरा के ढांचा भर नो हे, बल्कि गांव के प्रगति अऊ एकजुटता के चिनहारी हे। अब पंचायत के बैठक सुव्यवस्थित तरीका ले होही, सामुदायिक कार्यक्रम आसानी ले आयोजित होही अऊ अवइया पीढ़ि घलोक एकर लाभ उठा सकही।
बिलासपुर जिला के मस्तुरी ब्लॉक अंतर्गत ग्राम पंचायत चिस्दा म नवीन पंचायत भवन के निर्माण होए ले गांव वाले मन म खुशी के लहर हे। मनरेगा के तहत निर्मित पंचायत भवन बर कुल 18.03 लाख रूपिया के राशि स्वीकृत होए हे, जेमां ले कुल 16.61 लाख रूपिया के राशि व्यय करे गीस अऊ 1191 मानव दिवस सृजित होइस। ए भवन के निर्माण ले ग्राम पंचायत के बैठक अऊ आन सामुदायिक आयोजन बर स्थायी स्थल उपलब्ध हो गए हे। पहिली बैठक अऊ पंचायत सामुदायिक कार्यक्रम मन बर उपयुक्त स्थल के अभाव ले गांव वाले मन ल असुविधा होत रहिस, फेर अब पंचायत भवन के निर्माण ले ये समस्या दूर हो गए हे। पंचायत भवन निर्माण काम म ग्राम पंचायत के गांव वाले मन, कार्य एजेंसी, समस्त संबंधित शासकीय संस्था अऊ विभाग मन के विशेष मार्गदर्शन अऊ सहयोग रहिस। निर्माण काम बर स्वीकृत कुल राशि 18.03 लाख रहीस, जेमां मजदूरी राशि 4.06 लाख अऊ सामान राशि 13.97 लाख के स्वीकृति दे गए रहिस। पंचायत के स्थायी भवन बने ले प्रचायत के अन्तर्गत बैठक, पंचायत के विकास के दिशा तय करे, विकास के योजना बनाके क्रियान्वित कराए बर एक स्थायी स्थल बन गीस,  जेखर से अवइया समय म पंचायत ल विकास कोति ले जाय म महत्वपूर्ण भूमिका होही।