श्रीसीमेंट लिमिटेड कम्पनी अऊ आर.आर. इस्पात कम्पनी ह राज्य सरकार के संग करिस एम.ओ.यू.
करीबन 550 मनखे मन ल मिलही रोजगार
रायपुर, मुख्यमंत्री श्री भूपेश बघेल के अध्यक्षता म आज इहां ऊंखर निवास कार्यालय म आयोजित राज्य निवेश प्रोत्साहन बोर्ड के बैठक म सीमेंट अऊ फेब्रिकेटेड स्टील उत्पाद तियार करे के दो परियोजना मन म करीबन दू हजार करोड़ रूपिया के पूंजी निवेश के दू एम.ओ.यू. म दस्कत करे गीस। एखर से 550 मनखे मन ल रोजगार के अवसर मिलही। छत्तीसगढ़ सरकार के संग श्रीसीमेंट लिमिटेड कम्पनी अऊ आर.आर. इस्पात कम्पनी ह एम.ओ.यू. करिस। मुख्यमंत्री ह दुनों कम्पनी मन के पदाधिकारी मन ल बधाई देवत उम्मीद जताइन कि लउहेच ए परियोजना मन म उत्पादन शुरू होही अऊ मनखे मन ल रोजगार के बने अवसर मिलही। मुख्यमंत्री ह कम्पनी के पदाधिकारी मन ले स्थानीय मनखे मन ल रोजगार देहे के आग्रह करिन।
एमां ले छत्तीसगढ़ सरकार अऊ श्रीसीमेंट लिमिटेड कम्पनी के बीच दू हजार करोड़ रूपिया के निवेश बर एम.ओ.यू. करे गीस। एखर ले करीबन 450 मनखे मन ल रोजगार मिलही। ये एम.ओ.यू. के तहत श्रीसीमेंट कम्पनी के परियोजना कोति ले 8.3 मीट्रिक टन क्लिंकर, 13.5 मीट्रिक टन सीमेंट के उत्पादन करे जाही। ये परियोजना म 170 मेगावाट क्षमता के केप्टिव पावर प्लांट लगाए जाही। ये प्रस्तावित परियोजना बलौदाबाजार-भाटापारा जिला के सिमगा तहसील के ग्राम खपरीडीह म लगाये जाही। एखर बर 400 एकड़ जमीन के जरूरत होही, जऊन कम्पनी तीर हावय। कम्पनी के पदाधिकारी मन ह बताइन कि करीबन डेढ़ ले दू साल म ये परियोजना म उत्पाद शुरू हो जाही।
दूसर एम.ओ.यू. छत्तीसगढ़ सरकार अऊ आर.आर. इस्पात कम्पनी के बीच करे गीस। ये परियोजना म करीबन 19 करोड़ 85 लाख रूपिया के पूंजी निवेश करे जाही। एखर से 100 मनखे मन ल रोजगार मिलही । ये परियोजना रायपुर जिला के उरला औद्योगिक क्षेत्र के अछोली गांव म लगाये जाही। ये परियोजना बर 6.75 हेक्टेयर जमीन के जरूरत परही, जऊन कम्पनी तीर हावय। ये परियोजना म रेलवे ब्रिज बर स्टील स्ट्रक्चर, बिजली के खंम्भा जइसे उत्पाद तियार करे जाही। कम्पनी के प्रतिनिधि मन ह बताइन कि करीबन एक साल के अवधि म उत्पाद शुरू हो जाही।
राज्य शासन के तरफ ले ए एम.ओ.यू. म उद्योग अउ वाणिज्य विभाग के प्रमुख सचिव श्री मनोज कुमार पिंगुआ ह दस्कत करिस। श्रीसीमेंट के संग करे एम.ओ.यू. म कम्पनी के तरफ ले श्री रवि तिवारी ह अऊ आर.आर. इस्पात कम्पनी के संग करे एम.ओ.यू. म श्री दिनेश अग्रवाल ह हस्ताक्षर करिस। ये बेरा म मुख्य सचिव श्री सुनील कुमार कुजूर, अपर मुख्य सचिव वित्त श्री अमिताभ जैन, मुख्यमंत्री के प्रमुख सचिव श्री गौरव द्विवेदी संग संबंधित कम्पनियों के पदाधिकारी अऊ संबंधित विभाग मन के अधिकारी उपस्थित रहिन।
