उत्तर बस्तर कांकेर, मुख्यमंत्री श्री भूपेश बघेल के निर्देश म दुर्गूकोंदल विकासखण्ड के ग्राम गोटुलमुण्डा म लघु धान्य प्रसंस्करण केन्द्र के स्थापना करे गए हे। प्रसंस्करण केन्द्र बर स्व-सहायता समूह के महिला मन कोति ले शेड के निर्माण करे गीस अऊ कोदो अऊ रागी के प्रसंस्करण के काम चालू करे गीस, जेखर से समूह के महिला मन ल अब तक करीबन 06 लाख रूपिया के आमदनी हो गे हे। ये लघु धान्य प्रसंस्करण केन्द्र ले करीबन 350 कृषक जुड़े हें, जेन कोदो, कुटकी, रागी के उत्पादन करत हें।
महिला समूह कोति ले लघु धान्य प्रसंस्करण इकाई बर किसान मन ले 38 रूपिया प्रति किलो के दर ले रागी खरीदे जात हे, जबकि शासन कोति ले रागी के समर्थन मूल्य 33 रूपिया निरधारित करे गए हे। कोदो ल 25 रूपिया प्रति किलो के दर ले किसान मन ले खरीदे जात हे अऊ प्रसंस्करण के बाद ओला 70 रूपिया प्रति किलो के दर ले विक्रय करे जात हे। अदसनहे रागी ल 50 रूपिया प्रति किलो के दर ले बेचे जात हे।
कलेक्टर डॉ प्रियंका शुक्ला ह बुधवार के लघु धान्य प्रोसेसिंग इकाई गोटुलमुण्डा के आकस्मिक निरीक्षण करिन अऊ स्व-सहायता समूह ले जुडे महिला मन ले बातचीत करके उंखर गतिविधि मन के जानकारी लीन। समूह के महिला मन ह बताइन कि प्रोसेसिंग यूनिट के स्थापना ले उमन ल आर्थिक आमदनी होवत हे अऊ ऊंखर जीवन म बदलाव आए हे। प्रसंस्कृति कोदो अऊ रागी ल पूरक पोषण आहार बर ऑगनबाड़ी केन्द्र मन ल सप्लाई करे जाथे, संगेच दुर्ग के कम्पनी ह तको खरीदत हे। उमन बताइन कि जल्दीच इहॉ मिनी राईस मिल के स्थापना घलोक करे जाही।
मुख्यमंत्री के कहे ले गोटुलमुण्डा म होइ लघु धान्य प्रसंस्करण इकाई स्थापित
