- लइका मन ल दीन फल, पोषाहार, कपड़ा अऊ हैंडवाश
- अवइया एक साल म दुगली सेक्टर के 45 गांव मन म कुपोषण दूर करे के लक्ष्य
रायपुर, मुख्यमंत्री श्री भूपेश बघेल ह आज धमतरी जिला के नगरी विकासखण्ड के प्राथमिक स्वास्थ्य केन्द्र दुगली म लइका जतन ठउर के उद्घाटन करिन। दुगली सेक्टर ल कुपोषण मुक्त करे पोषण पुनर्वास केन्द्र के तर्ज म स्थापित ये अभिनव लइका जतन ठउर म कुपोषित लइका मन के संपूर्ण उपचार अऊ चिकित्सीय देखभाल करे जाही। इहां लइका मन बर 10 बिस्तर के व्यवस्था हे। 18 प्रतिशत कुपोषण दर वाले दुगली सेक्टर के 45 गांव मन ल अवइया एक साल म कुपोषण मुक्त करे के लक्ष्य हे। मुख्यमंत्री श्री भूपेश बघेल, स्वास्थ्य मंत्री श्री टी.एस. सिंहदेव, राज्यसभा सांसद श्री पी.एल. पुनिया अऊ विधायकद्वय श्री मोहन मरकाम अऊ श्रीमती लक्ष्मी ध्रुव नवनिर्मित लइका जतन ठउर म इलाजरत लइका मन अऊ उंखर माताओं ले मिले अऊ ओ मन ल फल, रेडी-टू-ईट पोषाहार, कपड़े अऊ हैंडवाश वितरित करिन।
लइका जतन ठउर म डॉक्टरों कोति ले कुपोषित लइका मन के वजन मूल्यांकन करके उचित प्रोटीनयुक्त आहार दे जाही। इहां कुपोषित लइका मन के माता मन ल घलोक लइका मन ल दिए जात भोजन के विसय म प्रशिक्षित करे जाही, ताकि जब लइका 15 दिन के उपचार के बाद घर लहुटय, त ऊंखर वजन के वृद्धि के अनुपात म पौष्टिक भोजन तियार करे म माता मन ल सहूलियत होवय। आंगनबाड़ी केन्द्र मन म घलोक ए लइका मन के सतत निगरानी करे जाही। संगेच डॉक्टर मन कोति ले फॉलोअप घलोक करे जाही, जेखर से कि पूरा दुगली सेक्टर कुपोषण मुक्त हो सकय।
लइका जतन ठउर के उद्घाटन के अवसर म मुख्यमंत्री श्री बघेल स्वास्थ्य विभाग के चिरायु अऊ आन योजना मन के हितग्राही मन ले घलोक मिलिन। लोकार्पण कार्यक्रम म स्वास्थ्य विभाग के सचिव श्रीमती निहारिका बारिक सिंह, संचालक श्री नीरज बनसोड, राष्ट्रीय स्वास्थ्य मिशन के संचालक डॉ. प्रियंका शुक्ला, कलेक्टर श्री रजत बंसल अऊ धमतरी के मुख्य स्वास्थ्य अऊ चिकित्सा अधिकारी डॉ. डी.के. तुर्रे संग स्वास्थ्य विभाग के बहुत अकन अधिकारी अऊ गणमान्य नागरिक मौजूद रहिन।
