मुख्यमंत्री श्री विष्णु देव साय ह लीन पांच अहम फैसला

रायपुर, 15 मार्च, 2024। मुख्यमंत्री श्री विष्णु देव साय ह आज अधिकारी-कर्मचारी अउ मीडियाबंधु मन के हित म पांच अहम फैसला लीन। एमां अधिकारी-कर्मचारी मन ल सातवां वेतनमान म चार प्रतिशत के महंगाई भत्ता देना घलोक सामिल हे। एकर लाभ पेंशनर मन ल घलोक मिलही। महंगाई भत्ता के ये राशि एक मार्च 2024 के तारीक ले मिलही। राज्य के अधिकारी-कर्मचारी मन ल सातवां वेतनमान के एरियर्स के आखरी किश्त के राशि के भुगतान घलोक होही। एकर संगेच मुख्यमंत्री ह प्रमुख सचिव, पंचायत अउ ग्रामीण विकास श्रीमती निहारिका बारिक के अध्यक्षता म एक समिति घलोक बनाय हे जेन कर्मचारी मन के समस्या मन के संबंध म समीक्षा करहीं अऊ एकर निराकरण ले संबंधीत सुझाव शासन ल प्रस्तुत करही। ग्राम पंचायत सचिव मन ल घलोक राहत देवत ऊंखर 55 दिन के हड़ताल अवधि के वेतन भुगतान करे के निर्णय ले गीस। अर्जित अवकाश म ये हड़ताल अवधि एडजस्ट होही। ए निर्णय ले होली के तिहार म कर्मचारी मन के परिवार म खुसी के रंग भर जाही।
मुख्यमंत्री ह कहिन कि पत्रकार अउ मीडियाजगत ले जुड़े बंधु मन के खिलाफ उत्पीड़न के बहुत अकन शिकायत आए रहिस। ए संबंध म हम गृह सचिव के अध्यक्षता म कमेटी बनाए के घोषणा करत हन। मुख्यमंत्री ह आगू बताइस कि ए कमेटी म पत्रकार मन समेत आन सदस्य मन ल घलोक नियुक्त करे जाही।