- प्रदेश ल पूर्ण साक्षर बनाए बर सबो ले करिन योगदान के अपील
- ‘मुख्यमंत्री शहरी कार्यात्मक साक्षरता कार्यक्रम’ ले मनखे मन ल बनाए जाही डिजिटल साक्षर
- युवा मन म उद्यमिता के विकास अऊ प्रोत्साहन सरकार के सबले बड़े प्राथमिकता
- युवा मन के संग चालू करे जाही प्रदेश के सामाजिक, आर्थिक विकास के मोर्चा म बड़े अभियान
रायपुर, मुख्यमंत्री श्री भूपेश बघेल ह आज अपन मासिक रेडियो कार्यक्रम ‘लोकवाणी’ के दुसरा कड़ी म प्रदेशवासी मन ल सम्बोधित करिन। मुख्यमंत्री ह अंतर्राष्ट्रीय साक्षरता दिवस म प्रसारित ये वार्ता म छत्तीसगढ़ ल पूर्ण साक्षर बनाए बर सबो के सहयोग के आव्हान करिन। उमन कहिन कि प्रदेश म चालू करे गए ‘मुख्यमंत्री शहरी कार्यात्मक साक्षरता कार्यक्रम’ के माध्यम ले प्रदेश के 14 साल ले 60 साल तक आयु के मनखे मन ल डिजिटल साक्षर बनाए जाही। ये नागरिक मन के सशक्तिकरण के दिशा म एक बड़का कदम होही। मुख्यमंत्री ह गुरूजन मन ल नमन करत कहिन कि नवा पीढ़ी के भविष्य गढ़े म शिक्षक मन के अहम भूमिका हे। उमन कहिन कि राज्य म शिक्षा के अधिकार कानून ल विस्तारित करे गए हे। ये कानून के तहत 12वीं कक्षा तक निःशुल्क शिक्षा के अधिकार के विस्तार करे गए हे। श्री बघेल ह प्रदेश म आन पिछड़ा वर्ग ल 27 प्रतिशत, अनुसूचित जाति ल 13 प्रतिशत, अनुसूचित जनजाति मन ल 32 प्रतिशत अऊ आर्थिक रूप ले कमजोर परिवार मन ल 10 प्रतिशत आरक्षण देहे के निर्णय के उल्लेख करत कहिन कि छत्तीसगढ़ म 82 प्रतिशत के आरक्षण सामाजिक न्याय के दिशा म एक महत्वपूर्ण कदम साबित होही।
