रायपुर, मुख्यमंत्री श्री भूपेश बघेल ह 5 सितमबर के दिन शिक्षक दिवस के अवसर म सबो शिक्षक मन संग प्रदेशवासी मन ल हार्दिक बधाई अऊ शुभकामना दिए हें। मुख्यमंत्री ह आज इहां जारी अपन बधाई संदेश म कहे हें कि ये दिन हमला अपन देश के महान दार्शनिक अऊ पूर्व राष्ट्रपति सर्वपल्ली डॉ. राधाकृष्णन के जन्म जयंती के घलोक सुरता कराथे। श्री बघेल ह कहिन कि स्वर्गीय डॉ.राधाकृष्णन खुद एक विद्वान, चिंतक अऊ प्राध्यापक रहिन। उंखर जन्मदिन शिक्षक दिवस के रूप म मनाके हम गौरवान्वित महसूस करत हन। मुख्यमंत्री ह कहिन कि राष्ट्र निर्माण अऊ समाज म मानव संसाधन के विकास म शिक्षक के महत्वपूर्ण भूमिका हे।
मुख्यमंत्री ह कहिन कि प्रदेश के स्कूल मन म शिक्षा के गुणवत्ता सुधारे बर बहुत अकन नवाचार चालू करे हे। राज्य सरकार 15 हजार नियमित शिक्षक मन के भर्ती करत हे। महाविद्यालय मन म घलोक करीबन एक हजार ले जादा शिक्षक मन के भर्ती करे जात हे। उमन कहिन कि छत्तीसगढ़ देश के पहिली अइसे राज्य हे, जिहां शिक्षा के अधिकार अधिनियम के तहत कक्षा बारहवीं तक के लइका मन ल अनिवार्य शिक्षा के दायरे म लाए गए हे।
