रायपुर, मुख्यमंत्री श्री भूपेश बघेल ले भारतीय प्रशासनिक सेवा के प्रशिक्षु अधिकारी मन ह काल संझा ऊंखर निवास कार्यालय म सौजन्य मुलाकात करिन। मुलाकात के समय मुख्यमंत्री ह युवा अधिकारी मन ल सुराजी गांव योजना के थीम समझाईन अऊ ओ मन ल कहिन के आगू आपो मन ए योजना के एक-एक प्रोजेक्ट ल मॉडल बनात अपन दायित्व वाले जिला मन म बढ़िया काम कराए ल कहिन।
हम आप ल बता देवन के भारतीय प्रशासनिक सेवा के (2018 बैच) के अधिकारी मन के उन्मुखीकरण प्रशिक्षण छत्तीसगढ़ प्रशासन अकादमी म चलत हे। मुख्यमंत्री ह भारतीय प्रशासनिक सेवा के प्रशिक्षु अधिकारी मन ल नरवा, गरवा, घुरवा अऊ बाड़ी के विकास अऊ संवर्धन के बारे म विस्तार ले जानकारी दीन अऊ ओ मन ल हमेशा फील्ड विजिट करे के समझाईश दीन। फील्ड विजिट ले बहुत कुछ सीखे के मौका मिलथे। नवा-नवा जानकारी के संगेच समस्या मन ल समझे अऊ ऊंखर हल खोजे म मदद मिलथे।
मुख्यमंत्री ह कहिन कि सुराजी गांव योजना ले गांव मन के अर्थव्यवस्था सुधरही। एखर से खेती किसानी सुधार के संगे संग रोजगार के अवसर बाढे अउ पर्यावरण म घलोक सुधार होही। गांव के मनखे मन के बाड़ी ले सब्जी अऊ दुग्ध उत्पादन ले कुपोषण कम करे म मदद मिलही। घुरवा ले जैविक खेती ल बढ़ावा मिलही। मुख्यमंत्री ह कहिन कि नरवा के पुर्नजीवन बर साईंटिफिक तरीका ले काम होना चाही। उमन बताइस कि इसरो ले जमीन के सबो प्रकार के डाटा हमर तीर हे, एकर उपयोग करे जाए। नरवा पुर्नजीवन ले सब स्वाईल वाटर अऊ सरफेस वाटर संग्रहण म मदद मिलही। नदिया मन म धार जादा दिन तक बने रहिही अऊ तिर-तखार के क्षेत्र म बोरिंग सूखे के स्थिति नइ आही। उमन रेन वाटर हार्वेस्टिंग के महत्व म घलोक प्रकाश डालिन। हम आप ल ये बात बता देवन के सुराजी गांव योजना म गांव मन म नरवा, गरवा, घुरवा अऊ बाड़ी के संवर्धन अऊ विकास बर गांव मन म नरवा के पुर्नजीवन, गौठान मन के विकास, घुरवा के माध्यम ले जैविक खाद, गोबर गैस, चारागाह विकास अऊ दुग्ध उत्पादन आदि बर काम करे जात हे।
ए अवसर म प्रभारी मुख्य सचिव श्री सी.के. खेतान, मुख्यमंत्री के प्रमुख सचिव श्री गौरव द्विवेदी, छत्तीसगढ़ प्रशासनिक अकादमी के डी.जी. श्रीमती रेणु पिल्लई, संचालक श्री आलोक अवस्थी, सहायक कलेक्टर श्री अभिषेक शर्मा, श्री अबिनाश मिश्रा, श्री देवेश कुमार ध्रुव, श्री संबित मिश्रा, अऊ श्री उत्साह चौधरी घलोक उपस्थित रहिन।
