रायपुर, मुख्यमंत्री श्री भूपेश बघेल ह राष्ट्रपिता महात्मा गांधी के 150वां जयंती के बेरा म प्रदेश म 2 अकटूबर ले चालू करे जात राज्यव्यापी कुपोषण मुक्ति अभियान म सरपंच मन ले सक्रिय भागीदारी के आव्हान करत चिट्ठी लिखे हें।
मुख्यमंत्री ह अपन चिट्ठी म लिखे हें कि राज्य के 35.60 प्रतिशत नान्हें लइका कुपोषण ले अऊ 15 ले 49 साल के 41.50 प्रतिशत महिला मन एनीमिया ले पीडि़त हे। ये आंकड़ा अन्तरात्मा ल झकझोरइया हे अऊ कोनो संवेदनशील मनखे ल विचलित कर सकत हे। कुपोषण अऊ एनीमिया के प्रकोप ले अतीक जादा मनखे मन के पीडि़त होए ले भावी पीढ़ी के भविष्य के सहज ही अन्दाज लगाए जा सकत हे। अइसे म हमार लइका अऊ बहिनी कहूं अस्वस्थ रइहीं त सभ्य समाज के कोनो मनखे ल सुख-चैन ले जीए के नैतिक अधिकार नइ बनय।
श्री बघेल ह चिट्ठी म कहे हें कि हमन राज्य ले कुपोषण अऊ एनीमिया ल जड़ ले खतम करे के संकल्प लेहे हवन। पूरा राज्य म ये महायज्ञ 2 अकटूबर 2019 ले सुरू करे जाही। योजना के अंतर्गत राज्य के शत-प्रतिशत कुपोषित अऊ एनीमिया पीडि़त मन ल उंखर रूचि अऊ शारीरिक जरूरत के मुताबिक रोजेच निःशुल्क भोजन के व्यवस्था करे जाही। ये काम केवल शासकीय उदीम ले सफल नइ हो सकय, ये मां राज्य के सबो मनखे मन के सक्रिय भागीदारी जरूरी हे। मुख्यमंत्री ह सरपंच मन ले आग्रह करत कहे हें कि मैं सबो ले विनम्र अनुरोध करत हंव कि यथोशक्ति तन-मन अऊ धन ले ये पुनीत काम म अपन योगदान देवव। जब बेरा मिलय, पीडि़त मन ल अपन हाथ ले भोजन कराए के पुण्य अवश्य प्राप्त करव।
श्री बघेल ह विश्वास प्रकट करिन हे कि आप सबो मन के सहयोग ले हम अवइया 3 बछर म राज्य ल कुपोषण अऊ एनीमिया ले मुक्त करा लेबोन अऊ ‘स्वस्थ छत्तीसगढ़‘ के कल्पना साकार कर सकबोन।
