राज्यपाल श्री विश्वभूषण हरिचंदन ह नेताजी सुभाषचंद्र बोस के जयंती म ओ मन ल नमन करिन

रायपुर, 23 जनवरी 2024। राज्यपाल श्री विश्वभूषण हरिचंदन ह महान स्वतंत्रता संग्राम सेनानी नेताजी सुभाषचंद्र बोस के जयंती म ओ मन ल नमन करिन। राज्यपाल ह राजभवन म नेताजी सुभाषचंद्र बोस के छायाचित्र म पुष्पांजलि अर्पित करके ओ मन ल श्रद्धांजलि दीन।
ए बेरा म राज्यपाल श्री हरिचंदन ह कहिन कि नेताजी सुभाषचन्द्र बोस देश के स्वतंत्रता आंदोलन के महानायक रहिन। ऊंखर राष्ट्र के प्रति त्याग अउ बलिदान के भावना ह भारतीय स्वतंत्रता आंदोलन ल नवा दिशा अऊ दशा प्रदान करिन। राष्ट्र के प्रति ऊंखर समर्पण, देश ल आजाद देखे के प्रबल भावना अऊ ऊंखर अदम्य साहस भरे कदम ह तत्कालीन समय म देश म विशेष कर युवा मन म एक नवा ऊर्जा अउ उत्साह के संचार करे रहिस। ओ मन दूरदृष्टि रखत रहिन अऊ देश ल स्वतंत्र कराए के रणनीति तैयार करिन। ए खातिर उमन देश घलोक छोड़ दीन। नेताजी ह आजाद हिन्द फौज के कमान संभाले के बाद देश के आजादी ले पहिलीच अंडमान निकोबार म अस्थाई सरकार बनाइन अऊ भारत के पहिली प्रधानमंत्री बनिन। ए कदम ले उमन अंग्रेज मन ल कड़ा संदेश दे रहिन कि भारत म अंगरेजी शासन जादा दिन तक नइ रहय। उमन युवा मन के आहवान करिन कि ‘‘तुम मोला खून दौ में तुमन ल आजादी देहंव‘‘।
राज्यपाल ह कहिन कि नेताजी सुभाषचन्द्र बोस के ओजस्वी व्यक्तित्व, अभूतपूर्व संगठन क्षमता, साहस, निष्ठा अउर नेतृत्व के अद्भुत गुण हमेशा याद करे जाही। ऊंखर विचार अउ आदर्श हमार बर धरोहर के जइसे हे। आजादी के लड़ाई म हम ऊंखर योगदान ल कभू नइ भूला सकन।
ए अवसर म राज्यपाल के सचिव श्री अमृत कुमार खलखो, विधिक सलाहकार श्री राजेश श्रीवास्तव संग राजभवन के अधिकारी-कर्मचारी मन ह घलोक नेताजी सुभाषचंद्र बोस के फोटू म पुष्प अर्पित करके उमन ल नमन करिन।