रायपुर, छत्तीसगढ़ शासन के महत्वाकांक्षी योजना नरवा, गरूवा, घुरवा अऊ बाड़ी के अंतर्गत गरुवा कार्यक्रम के तहत ग्राम पंचायत रामपुर (भांड) म गौठान बने ले करीबन 800 मवेसी मन ल आश्रय मिले हे अऊ अब सड़क मन म मवेसी मन के घुमई कम होए हे। बेमेतरा जिला के जनपद पंचायत बेरला अंतर्गत मुख्य मार्ग म बसे ग्राम पंचायत रामपुर (भांड) म हरेली तिहार के अवसर म महिला अऊ बाल विकास, समाज कल्याण मंत्री बेमेतरा जिला के प्रभारी मंत्री श्रीमती अनिला भेडि़या ह गौठान के लोकार्पण करे रहिन। गौठान म गांव वाले मन कोति ले चारा के दाना के संगें-संग मवेसी मन के उचित प्रबंधन, देखरेख बर ग्राम स्तर म गौठान प्रबंधन समिति के चयन करे हे, जेकर कोति ले गौठान के संचालन चालू कर दे गए हे। जेमां पशु अवशेष के वैज्ञानिक तरीका ले प्रबंधन करके गोबर ले आधुनिक खाद तियार करे, गौ-मूत्र ले कीटनाशक तियार करे अऊ गौठान स्थल म कई प्रकार के आर्थिक गतिविधि संचालित करे जाही। ग्राम गौठान प्रबंधन समिति रामपुर (भांड) के सदस्य मन कोति ले गौठान के संचालन करे ले अब मवेशी एके जगा सुव्यवस्थित रूप ले सकलाए रहिथें। मवेसी मन ले फसल सुरक्षित होए ले किसान घलोक निश्चिंत हे।
गौठान म मवेसी मन बर कच्चा शेड बनाय गए हे जेमे छइंहा के संगे संग बरसात के दिन म चबूतरा के निर्माणकरके सुक्खा जगा के घलोक व्यवस्था करे गए हे अऊ पानी के टंकी के निर्माण ले गौठान म ही पीए के पानी के व्यवस्था करे गए हे। गौठान म प्राकृतिक छइंहा बर बरगद के पेड़ म चबूतरा के निर्माण कराए गए हे। सबो पशु मन ल गौठान के भीतरेच सुनियोजित तरीका ले रखे जाय ले दुर्घटना के संभावना बिक्कट हद तक कम हो गए हे। खेत मन के फसल ल घलोक अब मवेसी मन कोति ले चरे के समस्या कम हो गए हे। पशु मालिक अब मवेसी मन ल गौठान म भेजत हें। ग्राम पंचायत म करीबन 10 एकड़ जमीन म पशु मन बर चारागाह के विकास ग्राम पंचायत कोति ले कराए गए हे। चारा अऊ पानी ल एक संग खवाए बर कोटना संग पक्का पशु शेड के घलोक निर्माण कराए गए हे।
गौठान ल आधुनिक रूप ले विकसित करे के पहल करे गए हे। जेखर तहत चिखला आदि ले बचाव बर जमीन विकास काम, सीपीटी निर्माण काम, पौधरोपण काम, आदि के निर्माण कराए गए हे। मवेसी मन ल नवा जीवन प्रदान करइया ये गौठान भविष्य म बहुत सफल अऊ चरवाहा मन ल आत्मनिर्भर बनाए के दिशा म अग्रसर हे।
