राष्ट्रीय आदिवासी नृत्य महोत्सव-2021 : नाइजीरिया अऊ फिलिस्तीन के कलाकार मन के जीवंत नृत्य के प्रस्तुति ले दर्शक होइन मंत्रमुग्ध

रायपुर, राष्ट्रीय आदिवासी नृत्य महोत्सव के दूसर आयोजन के शुभारंभ अवसर म आज राजधानी रायपुर के साइंस कॉलेज मैदान म नाइजीरिया अऊ फिलिस्तीन के कलाकार मन के अद्भूत अऊ जीवंत प्रस्तुति ह दर्शक मन ल मंत्रमुग्ध कर दीस। महोत्सव म झारखरण्ड के मुख्यमंत्री अऊ छत्तीसगढ़ के मुख्यमंत्री, विधानसभा अध्यक्ष, मंत्रीमण्डल के सदस्य मन, विधायक मन के उपस्थिति म नाइजीरिया के कला दल ह अनेकता म एकता म आधारित इंक्काबी नृत्य प्रस्तुत करिस। ये नाइजीरिया के इडेम अऊ इनाया नदी के जलदेवी ल समर्पित नृत्य हे। इंक्काबी नृत्य के अद्भृत शैली ह दर्शक मन के बीच एक अलग पहिचान छोड़त मन मे उमंग अऊ उत्साह के संचार कर दीस। मंच म फिलिस्तीन के कलाकार मन ह पारंपरिक दाबका नृत्य प्रस्तुत करिन। मनमोहक लय, धुन अऊ ताल ले ताल मिलाके होवइया ये नृत्य ह पूरा फिलिस्तिन के संस्कृति उपर दर्शक मन ल डुबकी लगाय म मजबूर कर दीस।
तीन दिन ये आदिवासी महोत्सव म आज पहिली दिन एक के बाद एक छत्तीसगढ़ के प्राचीन कला, संस्कृति अउ पंरपरा उपर आधारित नृत्य कला के संगें-संग देश के कई प्रांत के अऊ विदेशी कलाकार मन के सांस्कृतिक प्रस्तुति मन ले मानो विश्व पटल म पारंपरिक कला-संस्कृति के अद्भुत छटा बिखेरत रहिस।
आदिवासी नृत्य महोत्सव म झारखण्ड के कलाकार मन ह कड़सा नृत्य प्रस्तुत करके दर्शक मन ल भाव विभोर कर दीस। छत्तीसगढ़ के बस्तर के माड़िया जनजातीय कलाकार मन ह गौर नृत्य के प्रस्तुति दीन। फसल कटाई के बाद ये होवईया ये विश्व प्रसिद्ध नृत्य ह हमला बस्तर के संस्कृति ल टमड़े बर मजबूर कर दीस। आज के ये प्रदर्शन सांस्कृति कार्यक्रम म त्रिपुरा के कलाकार मन ह होजागिरी महोत्सव म आधारित सांस्कृतिक नृत्य के प्रस्तुति दीन।
जानबा हे कि छत्तीसगढ़ के आदिवासी कला संस्कृति ल सहेजे, ऊंखर संवर्धन अऊ देश के कई प्रांत अऊ विदेश के आदिम कला-संस्कृति अऊ परम्परा ल विश्व पटल म एक संग जोड़े के उद्देश्य ले 28 अकटूबर ले 30 अकटूबर तक तीन दिन के भव्य राष्ट्रीय आदिवासी नृत्य महोत्सव के आयोजन करे जात हे। ये महोत्सव म देश के 27 राज्य, 06 केन्द्र शासित प्रदेश संग सात आन देशों के कलाकार हिस्सा लेवत हें।