श्री साहू ह उद्यान निर्माण, वृ़क्षारोपण अऊ नदी-नाला के संरक्षण म दीन विशेष जोर
रायपुर, लोक निर्माण अऊ गृह मंत्री श्री ताम्रध्वज साहू के अध्यक्षता म दुर्ग-भिलाई विकास योजना पुनर्विलोकन-2031 प्रारूप बर प्राप्त दावा आपत्ति अऊ सुझाव मन के संबंध म दुर्ग कलेक्ट्रेट के सभाकक्ष म छत्तीसगढ़ नगर अऊ ग्राम निवेश अधिनियम अंतर्गत गठित समिति के बैठक आयोजित करे गीस। बैठक म दुर्ग भिलाई निवेश क्षेत्र बर प्राप्त दावा आपत्ति अऊ सुझाव मन के संग समिति के सदस्य मन कोति ले जरूरी चर्चा करके प्रस्ताव पारित करे म सहमति दिए गीस। गृह मंत्री श्री ताम्रध्वज साहू ह कहिन कि अवइया समें के जरूरत मन ल ध्यान म रखत कार्ययोजना निरधारित करे जाए। उमन मुख्य रूप ले आवासीय बसाहट के अंतर्गत शहरी क्षेत्र मन म उद्यान निर्माण के काम ल मास्टर प्लान म सामिल करे म जोर दीन। अइसनहे उमन ये सुनिश्चित करे ल कहिन कि सड़क के किनारे वृक्षारोपण के काम ल बढ़ावा देवव। प्राकृतिक नाला अऊ तालाब मन के संरक्षण करे जाए। कोनो नहर बंद झन होवय, तालाब म पानी आना बंद ढन होवय, ये म विशेष ध्यान देहे ल कहिन। भविष्य के कार्ययोजना के आधार म सडक मन के निर्माण करे म घलोक जोर दे गीस। बैठक म विधायक श्री विद्यारतन भसीन संग जनप्रतिनिधि अऊ अधिकारीगण उपस्थित रहिन।
इहां ये बताना जरूरी हे कि दुर्ग-भिलाई निवेश क्षेत्र म पहिली के 49 बसाहट सामिल रहिस जेखर अभी हाल म भू उपयोग 12 अपरेल 1974 के दिन अंगीकृत करे गए रहिस। विशेष क्षेत्र विकास प्राधिकरण भिलाई बर विकास योजना साल 1987 म तियार करे गए रहिस, जऊन साल 2001 ल ध्यान म रखत तियार करे गए रहिस। ए योजना मन ल दुर्ग-भिलाई विकास योजना भाग-1, दुर्ग भिलाई विकास योजना भाग-2 म दुर्ग के रूप म प्रकाशित करे गए रहिस। दुर्ग-भिलाई विकास योजना पुनर्विलोकन 2031 के प्रकाशन 14 मार्च 2016 के दिन करे गए रहिन। एखर बर निरधारित अवधि म 1154 आपत्ति अऊ सुझाव आए रहिस, जेमा ले 19 सुझाव ले संबंधित रहिन। ओ आपत्ति अउ सुझाव मन ले 222 आपत्ति मान्य करे गीस, एमां 118 आंशिक मान्य अऊ 814 अमान्य करे गीस।
