वनांचल के गांव वाले मन के मेहनत अऊ समय के होइस बचत

धमतरी, वनांचल नगरी स्थित ग्राम खड़पथरा (ग्राम पंचायत भड़सिवना के आश्रित ग्राम) म सोलर ड्यूल पम्प लगे ले उहां के गांव वाले मन अड़बड़ खुश हें। सरपंच श्रीमती बिसन्तीन पालेश्वर, स्वच्छता समिति के अध्यक्ष श्रीमती दुर्गा, पंच श्रीमती चमेली बाई संग ग्रामीण श्रीमती सरोज साहू, श्री पटेल, श्री बेमेन सिंह पालेश्वर मन बताईन कि अब ओ मन ल पीए के पानी बर हैण्डपम्प के उपयोग नइ करना परय। काबर के छत्तीसगढ़ राज्य अक्षय ऊर्जा विकास अभिकरण (क्रेडा) कोति ले जिला के कई ठन गांव मन म सौर पेयजल पम्प स्थापित करके जल संकट ल दूर कर देहे गए हे। सोलर पम्प ले ओ मन ल आसानी ले पानी तो मिलिच जात हे, संगेच मेहनत अऊ समय के घलोक बचत हो गए हे। एखर अलावा सोलर ड्यूल पम्प के पानी के टंकी के सफाई विभाग के तकनीशियन मन नियमित रूप ले हर दो-तीन महिना म करत हें, जेखर से 24 घंटा साफ पीए के पानी गांव वाले मन ल मिलत हे। करीबन 500 के जनसंख्या वाले ग्राम खड़पथरा म 100 परिवार हे, जिहां 30 सितमबर 2019 के एक नग सोलर ड्यूल पम्प स्थापित करे गए हे।
सहायक अभियंता, क्रेडा श्री कमल पुरैना ह बताइस कि जिला के अइसन पिछड़े अउ अंदरूनी गांव, जिहां बिजली खम्बा पहुंच नइ पाए हे, उहां 24 घंटा स्वच्छ पेयजल उपलब्‍ध कराए के उद्देश ले सोलर ड्यूल पम्प स्थापित करे गए हे। ये पम्प दिन म सौर ऊर्जा के उपयोग करे बर अऊ एक ओवरहेड टैंक म पानी ल सकेले बर करे जात हे, जेन पूरा दिन चलथे। सूरज के अंजोर नइ होए म ये संयंत्र एक सामान्य हैण्ड पम्प के जइसे काम करथे। एकर मुताबिक गांव वाले मन ल 24 घंटा स्वच्छ पेयजल के आपूर्ति होवत हे। क्रेडा कोति ले जिला के ग्रामीण क्षेत्र मन म 445 सोलर ड्यूल पम्प संयंत्र के स्थापना करे गए हे। अइसनहे जल जीवन मिशन के तहत 12 मीटर के ऊंचाई म सोलर ड्यूल पम्प दस हजार लीटर क्षमता के टैंक स्थापित करे जात हे। एखर तहत जिला म 82 के लक्ष्य के विरूद्ध अब तक 39 नग सोलर ड्यूल पम्प संयंत्र के स्थापना करे गए हे अऊ 26 नग संयंत्र स्थापनाधीन हे। जानबा हे कि हर एक सोलर ड्यूल पम्प संयंत्र म पांच साल के वारंटी रहिथे। ये अवधि के बाद घलोक सोलर ड्यूल पम्प मन के कार्यशीलता कई साल तक आम तौर मं बाधित नइ होवय। क्रेडा के मैदानी अमला ह सरलग ए संयंत्र मन के मॉनिटरिंग अउ रख-रखाव करथे, ताकि संयंत्र हमेश सुचारू रूप ले क्रियाशील रहय।