रायगढ़, 20 अप्रैल 2020। कोरोना लॉकडाउन के सेती उबजे संकट के ये घड़ी म सरकार ह लघु वनोपज मन के समर्थन मूल्य म खरीदी अऊ नगद भुगतान के प्रक्रिया ले संग्राहक मन ल बड़का राहत मिले लगे हे। एखर से वनोपज के संग्राहक मन बर रोजगार के अवसर बाढ़ गए हे। ये कहना हे रायगढ़ जिला के अंतर्गत वनांचल के ग्रामीण वनवासी मन के। इमन वनोपज के संग्रहण के बेरा म कोरोना ले बचाव बर जउन निर्देशों जारी होए हे तेकर पूरा पालन करत हें।
रायगढ़ जिला म अब तक कुल 804.91 क्विंटल वनोपज के खरीदी होए हे जेकर 10 लाख 18 हजार 176 रूपिया के भुगतान संग्रहक मन ल करे जा चुके हे। जेमां 2 जिला यूनियन के अंतर्गत रायगढ़ जिला यूनियन म कुल 540.30 क्विंटल वनोपज के खरीदी करे हे। जेखर बर 6 लाख 99 हजार 247 रूपिया के भुगतान संग्राहक मन ल कर दे गए हे। अइसनहे धरमजयगढ़ जिला यूनियन अंतर्गत कुल 264.61 क्विंटल वनोपज के खरीदी होए हे। जेखर बर 3 लाख 18 हजार 929 रूपिया के भुगतान संग्राहक मन ल करे जा चुके हे। रायगढ़ जिला म मुख्यतः चरोटा, बहेड़ा, हर्रा, हर्रा कच, हर्रागोटा, ईमली, महुआ फूल, नागरमोथा, चरौटा बीज, थवई फूल, शहद, करंजबीज सवई घास, माहुल पत्ता, इन्द्रजौ, कांटा घास, कांटा झाड़ू, परसा फूल, भेलवा अउ गिलोय जइसे उत्पाद मन के संग्रहण अउ विक्रय करे जात हे।
