रायपुर, वाणिज्यिक कर मंत्री श्री टी.एस. सिंहदेव ह आज इहां नवीन थिरावन भवन म विभागीय अधिकारी मन अऊ व्यापार व उद्योग जगत के प्रतिनिधि मन के संग बैठक ले के जीएसटी उपर विस्तार ले चर्चा करिन। कई ठन संगठन के प्रतिनिधि मन ह बैठक म जीएसटी फाइलिंग उपर आवत समस्या मन ल सामने रखिन। उमन एखर सरलीकरण, क्रियान्वयन अऊ सॉफ्टवेयर के संबंध म कई सुझाव दीन। श्री सिंहदेव ह ऊंखर सुझाव मन म विचार करके जीएसटी काउंसिल के बैठक म रखे के बात कहिन। ओ मन जीएसटी म अब हर तीन महीना म व्यापार-उद्योग जगत के प्रतिनिधि मन ले चर्चा करहीं। उमन कहिन कि वाणिज्यिक कर विभाग व्यापार अऊ उद्योग मन के समस्या ल लेके गंभीर हे अऊ ओ मन येमा चर्चा बर हमेशा उपलब्ध हें।
वाणिज्यिक कर मंत्री श्री सिंहदेव ह जीएसटी फाइलिंग म व्यापारी, व्यवसाई, उद्योगपति अऊ चार्टर्ड एकाउंटेंट्स ल होवत परेशानी मन ल देखते ओ मन ल चर्चा बर बलाए रहिन। उमन कहिन कि जीएसटी ल सरल, सुविधाजनक अऊ प्रभावी बनाए खातिर, ये संबंध म आए प्रासंगिक सुझाव मन ल जीएसटी काउंसिल के आगू रखबोन। उमन येमा सरलग चर्चा बर विभागीय अधिकारी अऊ उद्योग-व्यापार जगत के प्रतिनिधि मन ल सामिल करके तकनीकी सलाहकार समिति बनाए के घलोक सुझाव दीन।
बैठक म उरला इंडस्ट्रियल एसोशिएशन, छत्तीसगढ़ चेंबर ऑफ कॉमर्स, भारतीय उद्योग परिसंघ (CII), कन्फेडरेशन ऑफ ऑल इंडिया ट्रेड्स (CAIT), रायपुर सेल टैक्स बार एसोशिएशन अऊ चार्टर्ड एकाउंटेंट्स एसोशिएशन के प्रतिनिधियों ह जीएसटी के संबंध म अपन सुझाव अऊ समस्या मन ल साझा करिन। वाणिज्यिक कर विभाग के सचिव अऊ आयुक्त श्रीमती रीना बाबा साहेब कंगाले अऊ जीएसटी के विशेष आयुक्त श्री शंकर लाल अग्रवाल घलोक बैठक म मौजूद रहिन।
