श्री रामलला के प्राण प्रतिष्ठा ले ननिहाल म उत्सव के वातावरण- मुख्यमंत्री श्री विष्णु देव साय

रायपुर, 23 जनवरी 2024। अयोध्या धाम म श्री रामलला के प्राण प्रतिष्ठा ले ऊंखर ननिहाल म घलोक उत्सव के माहौल हे। मकर संक्रांति ले जेन उत्सव शुरू होय हे वो प्राण प्रतिष्ठा के ऐतिहासिक दिन तक रहे हे। ये बात मुख्यमंत्री ह आज श्री रामलला के प्राण प्रतिष्ठा के शुभ अवसर म राजधानी रायपुर के आकाशवाणी चौक म आयोजित महाभोग अउ प्रसादी कार्यक्रम म कहीन। ए बेरा म मुख्यमंत्री ह इहां स्थित माँ महाकाली मंदिर म विधि-विधान ले पूजा-अर्चना करिन। मुख्यमंत्री ह माँ काली के आरती करके ओ मन ल लड्डु के भोग अर्पण करिन। ए मौका म मुख्यमंत्री श्री साय ल लड्डु ले तौले गीस। मुख्यमंत्री ह नेशनल एसोसिएशन फॉर ब्लाइंड स्कूल के दृष्टिबाधित लइका मन ल महाभोग के वितरण करे गीस।
मुख्यमंत्री श्री विष्णु देव साय ह अपन संबोधन म कहिन कि हम सबो बर कल के दिन ऐतिहासिक रहिस। अयोध्या धाम म छत्तीसगढ़ के भांचा प्रभु श्री रामलला टेंट ले निकलके भव्य मंदिर म विराजमान होइन। उमन कहिन कि रामायण म माता शबरी के घलोक जिक्र आथे अऊ ओखर आश्रम शिवरीनारायण म हे। माता शबरी वनवासी रहिन अऊ उमन वर्षों प्रभु के इंतजार करिन। उंखर तपस्या के परिणाम रहिस कि भगवान खुद ऊंखर पास आए रहिन अऊ शिवरीनारायण के पावन धरा म ही माता शबरी ह ओ मन ल बोइर खवाइन। श्री साय ह कहिन कि अइसनहे भक्त मन के लंबा अगोरा के बाद ऊंखर आराध्य के प्राण प्रतिष्ठा के शुभ अवसर आइस।
मुख्यमंत्री ह कहिन कि नवयुवक मंडल के तत्वावधान म रामभक्त चिट्ठि मन के माध्यम ले प्रभु बर अपन भावना व्यक्त करत हें। ए चिट्ठि मन ल सकेल के अयोध्या धाम ले जाए जाही। ए मौका म मुख्यमंत्री ह प्रभु श्री रामलला दर्शन योजना के जानकारी देवत कहिन कि ननिहाल वासी मन ल सरकारी खरचा म प्रभु के जन्मभूमि अयोध्याधाम के दर्शन कराए जाही।