रइपुर, 25 जून 2021 शुकवार। राज्य सरकार मुख्यमंत्री वृक्षारोपण प्रोत्साहन योजना ले लोगन म भक्कम उछाह दीखत हे, संगे—संग येला लेके जिज्ञासा तको हे। जेका समाधान बर राज्य के सबो जिला मुख्यालय मन के तीर प्रदर्शन-वन विकसित करे जाही। मुख्यमंत्री ह मुख्य सचिव ल सबो जिला मुख्यालय के तीरे—तीर कम से कम 10 एकड़ के सरकारी भूइयाँ ल चिन्हा पारे के हुकुम देहे हवय।
मुख्यमंत्री कहीन कि ये प्रदर्शन-वन मन ले ये योजना के प्रावधान अउ फायदा ल लोगन जानके एकर अधिक से अधिक लाभ उठा सकही। चिन्हांकित भूइयां म इमारती अउ आने जात के पेड़ लगाए के संगे —संग अंतरवर्तीय फसल के रूप म औषधीय पौधा तको लगा सकही । एमे वन अउ कृषि विभाग के अधिकारी के संगे —संग कृषि विश्वविद्यालय के वैज्ञानिक मन के सहायता ले सबो जात के वृक्षारोपण ले होवइया आर्थिक लाभ के विवरण तको प्रदर्शित करे के हुकुम दीन । एकर ले अवइया बछर म निजी क्षेत्र के लोगन ल तको वाणिज्यिक वृक्षारोपण बर पलौंदी मिलही।
मुख्यमंत्री वृक्षारोपण प्रोत्साहन योजना 1 जून 2021 ले शुरु करे गईस । एकर अंतर्गत जेन किसान मन ह खरीफ बछर 2020 म लीन हे, कहूँ वोमन धान के बलदा अपन खेत म वृक्षारोपण करथे, त उन ल अवइया 3 बछर तक प्रतिवर्ष 10 हजार रूपिया प्रति एकड़ के दर ले प्रोत्साहन राशि देहे जाही।
ओइसनेहे ग्राम पंचायत तीर उपलब्ध राशि ले कहूँ वाणिज्यिक वृक्षारोपण करे जाही, त एक बछर बाद सफल वृक्षारोपण के दशा म संबंधित ग्राम पंचायत ल शासन कोति ले 10 हजार रूपिया प्रति एकड़ के दर ले प्रोत्साहन राशि देहे जाही । एकर ले पंचायत मन के आय तको बाढ सकत हे। एकर छोड़ संयुक्त वन प्रबंधन समिति तीर उपलब्ध राशि ले कहूँ वाणिज्यिक आधार म राजस्व भूमि म वृक्षारोपण करे जाही, त पंचायते बरोबर संबंधित समिति ल एक बछर बाद 10 हजार रूपिया प्रति एकड़ के दर ले प्रोत्साहन राशि देहे के प्रावधान करे गे हवय। ये योजना के तहत पेड़ काटे अउ बेंचे के अधिकार संबंधित समिति ल देहे गे हवय।
