सुकमा, 22 अप्रैल 2020। जिहां कोरोना संकट ल देखत शासन ह 14 अप्रैल ले 3 मई तक लाकडाउन के अवधि बढ़ा देहे हे। उहें ये संकट के घड़ी म शासन के अति महत्वाकांक्षी योजना ’नरवा, गरवा, घुरवा, बाड़ी अउ मनरेगा’ जइसे रोजगारमूलक काम गांव वाले मन बर संजीवनी बूटी के जइसे मददगार साबित होवत हे अऊ संगेच मनखे मन के जीवन म नवा उछाह अउ आशा भरे के काम करत हे। कोरोना वायरस के संक्रमण ले बचाव बर जारी लॉकडाउन के बीच राज्य सरकार ह गांव वाले मन ल रोजगार देवाए बर, प्राकृतिक संसाधन मन के प्रबंधन करे अऊ आर्थिक रूप ले समर्थ बनाए के उद्देश्य ले मनरेगा के तहत काम उपलब्ध करावत हे। जिला के 137 ग्राम पंचायत मन म 530 काम प्रगति म हे जेमां 16 हजार ले जादा मनखे मन ल रोजगार मिलत हे। ये काम सोशल डिस्टेंसिंग अऊ सुरक्षा के हुकुम मन के पालन करत करे जात हे।
सुकमा जइसे संवेदनशील अउ बीहड़ क्षेत्र म लाकडाउन के बेरा म ग्राम पंचायत मन म आजीविका के साधन बहुत कम हो गये रहिस, मनखे मन के मनम जिहां रोजी-रोटी अउ परिवार के भविष्य के चिंता घर करे लगे रहिस। उहां अइसन म नरवा, गरवा, घुरवा, अउ बाड़ी अऊ मनरेगा योजना के तहत् कई ठन निर्माण काम चालू होए ले गांव के मनखे मन के चिंता दूर होवत हे। मनरेगा म छोटे अउ गरीब तबके के मनखे मन ल रोजी-रोटी बर सरल अउ सहज साधन मिलत हे। मदद के रूप म ग्राम वासी मन ल आर्थिक सहारा मिलत हे। जिला म लाकडाउन के बेरा म शासन-प्रशासन कोति ले सबो प्रायवेट श्रमिक काम मन म प्रतिबंध लगाए गए हे उहें सामाजिक-अंतराल रखत मनरेगा काम मन ल अनुमति दे गए हे। जिला के 153 म ले 137 ग्राम पंचायत मन म रोजेच 530 काम मन म 16 हजार ले जादा मजदूर काम करत हें। ये बेरा म पंचायत के सरपंच, पंच, सचिव अउ ग्राम रोजगार सहायक मन कोति ले काम के जगा म मजदूर मन के बीच सामाजिक अंतराल बनाये रखे, काम के पहिली अउ बाद म अऊ खाना खाए के पहिली साबुन ले हाथ धोवई, मास्क या साफ कपड़ा ले मुंह ढांके बर जागरूक करे के संगें-संग जरूरी सामान जइसे साबुन, मास्क, सेनेटाइजर आदि के व्यवस्था करे जात हे। कोरोना वायरस ले बचाव अउ रोकथाम बर शासन के हुकुम के पालन करे जात हे। गांवे म रोजगार मिले अउ समय म सरलग मजदूरी राशि मिले ले मजदूर अउ ग्रामवासी मन म खुशी के लहर हे।
