रायपुर, लल्लूराम के खबर के मुताबिक प्रदेश के कई तहसील सूखाग्रस्त हे। किसान मन बड़ चिंता म हें, बारिश नइ होए ले निराश किसान मन बर अब बड़ खुश खबरी हे। सरकार ह अल्प वर्षा के स्थिति ल देखत किसान मन ल खरीफ फसल के सिंचाई बर रविशंकर सागर जलाशय गंगरेल ले पानी देहे के निर्णय लेहे हे। प्रदेश के कृषि अऊ जल संसाधन मंत्री रविन्द्र चौबे ह 17 अगस्त ले जलाशय ले नहर मन म पानी छोड़े के निर्देश महानदी परियोजना के मुख्य अभियंता ल दीए हें। ये पहिली मौका हे जब सरकार ह बारिश के मौसम म नहर मन के माध्यम ले पानी देहे के फैसला लेहे हे। येकर ले पहिली पानी पाए बर किसान मन ल धरना प्रदर्शन करना परत रहिस।
जल संसाधन मंत्री रविन्द्र चौबे आज इहां रायपुर जिला के आरंग म आयोजित जिला स्तरीय किसान ऋण माफी तिहार म किसान मन के मांग म ये निर्देश जारी करे हें। चौबे ह कहिन कि जलाशय म आरक्षित जल के मात्रा ल संरक्षित रखत 17 अगस्त ले किसान मन ल खरीफ फसल के सिंचाई बर पानी छोड़े के कार्रवाई करे जाय। पानी के अपव्यय झन होवय एखर बर जरूरी इंतजाम घलोक सुनिश्चित करे जाय।
मुख्य अभियंता महानदी परियोजना रायपुर ह बताइस कि निर्देशानुसार खरीफ फसल के सिंचाई बर किसान मन ल पानी मुहैया कराए के कार्यवाही शुरू करे जात हे। उमन बताइस कि 16 अगस्त के स्थिति म महानदी परियोजना समूह के तीनों जलाशय रविशंकर सागर जलाशय, मुरूमसिल्ली जलाशय अऊ दुधावा जलाशय मन म क्रमशः 344.89 मि.घ.मी. (44.89 प्रतिशत), 51.74 मि.घ.मी. (31.94 प्रतिशत) अऊ 108.75 मि.घ.मी.(38.28 प्रतिशत) जल भराव हवय। ये प्रकार तीनों जलाशय मन म कुल 504.77 मि.घ.मी. जल भराव हे जबकि गत साल इही समें म ये तीनों जलाशय मन म कुल 815.88 मि.घ.मी. जल भराव रहिस।
उमन बताइस कि महानदी जलाशय परियोजना के ये तीनों बांध म संचित जल के मात्रा म ले हर साल पेयजल बर 140 मि.घ.मी., निस्तारी बर 71 घन.मी. औद्योगिक प्रयोजन बर 85 मि.घ.मी., वाष्पीकरण बर 60 मि.घ.मी. अऊ आन स्थानीय उपयोग व मत्स्य पालन बर 40 घन मी. ये प्रकार ले कुल 396 मि.घ.मी. जल आरक्षित रखे जाथे। ए मुताबिक आरक्षित जल के उपयोग के बाद सिंचाई बर मात्र 108.77 मि.घ.मी. जल ही बांचे रहिही। महानदी नहर प्रणाली अंतर्गत रायपुर, धमतरी, बालोद अऊ बलौदाबाजार-भाटापारा जिला सामिल हे जिहां 2 लाख 25 हजार हेक्टेयर क्षेत्र म सिंचाई बर करीबन 1100 मि.घ.मी. जल के जरूरत होही। मुख्य अभियंता ह बताइस कि अभी हाल म जलाशय मन म जल भराव ले ए जिला मन म 8 दिन तक पानी देहे जा सकही।
