रायपुर, 16 जनवरी 2024। स्वास्थ्य अउ परिवार कल्याण अउ चिकित्सा शिक्षा मंत्री श्री श्याम बिहारी जायसवाल आज सूरजपुर जिला के प्रवास के समय जिला अस्पताल के निरीक्षण बर पहुंचे रहिन। जिहां उमन जिला अस्पताल परिसर म प्रवेश करतेच रजिस्ट्रेशन काउंटर म अपन उपस्थिति दर्ज कराइन। उमन काउंटर म उपस्थित कर्मचारी मन ले रोज अवइया मरीजमन के आकड़ा के संबंध म जानकारी लीन। उमन समय-सारणी के मुताबिक कर्मचारी मन ल कांउटर म उपस्थित होए के निर्देश दीन ताकि अस्पताल म अवइया मरीज मन ल असुविधा के सामना झन करना परय। श्री जायसवाल ह रजिस्ट्रेशन कांउटर म काउंसलर बइठाए के निर्देश दीन ताकि मरीज अपन रोग के लक्षण के मुताबिक सही डाक्टर के चयन कर सकयं।
स्वास्थ्य मंत्री श्री जायसवाल ह उहां मरीज मन ले मुलाकात करिन अऊ ऊंखर इलाज उपर चर्चा करिन। उमन मरीज मन ले जिला चिकित्सालय के डॉक्टर अऊ स्टाफ के काम के बारे म पूछिन के बने काम करत हें के नहीं। डॉक्टर अपन ओपीडी कक्ष म समय म आथे के नही अऊ नियमित रूप ले वार्ड म भ्रमण करत हे कि नहीं आदि के संबंध म पूछिन। उमन सीएमएचओ अउ आन अधिकारी मन ल नियमित मॉनिटरिंग के निर्देश दीन ताकि स्वास्थ्य के स्तर ल अऊ बेहतर करे जा सकय। उमन स्पष्ट करिन कि सूरजपुर शहर के हृदय स्थल म स्थित जिला अस्पताल सर्व सुविधा युक्त अस्पताल के रूप म जाने जाय ताकि हर एक तबका के मनखे के इलाज इहां हो सकय। एखर संगेच उमन अस्पताल के अधोसंरचना अऊ मूलभूत जरूरत ल बेहतर करे के दिशा म सकारात्मक कदम उठाए के बात कहिन। उमन अस्पताल म उपलब्ध मशीन के जानकारी घलोक लीन। अस्पताल के साफ-सफाई बर जरूरी दिशा निर्देश दीन।
स्वास्थ्य अउ परिवार कल्याण, चिकित्सा शिक्षा मंत्री श्री जायसवाल ह जिला अस्पताल के करिन निरीक्षण
