स्वास्थ्य मंत्री श्री टी.एस. सिंहदेव ह हेल्थ एक्सपो के करिस अवलोकन

मेडिकल अउ लैब उपकरण के खासियत के लिस जानकारी, मशीन के डेमो घलो देखिस
जम्मो स्टॉल म जा के मेनुफेक्चरर्स, सप्लायर अउ सेवा प्रदाता मन से करिस चर्चा
रायपुर. स्वास्थ्य अउ परिवार कल्याण मंत्री श्री टी.एस. सिंहदेव ह आज रायपुर के एक निजी होटल म आयोजित हेल्थ एक्सपो (Medex-2023) के अवलोकन करिस। स्वास्थ्य विभाग द्वारा इंडियन मेडिकल एशोसिएशन (IMA), इंडियन डेंटल एशोसिएशन (IDA) अउ एशोसिएशन ऑफ हेल्थ केयर प्रोवाइडर्स – इंडिया (AHPI) के छत्तीसगढ़ चैप्टर के सहयोग ले ए तीन दिवसीय एक्सपो के आयोजन करे हे। 
14 जून ले 16 जून तक चले वाले ए एक्सपो में मेडिकल उपकरण, लैब उपकरण, मेडिकल फर्नीचर, मेडिकल क्लोदिंग (Clothing) अउ कन्ज्युमेबल्स (Consumables) बनाए अउ एकर आपूर्ति करे वाले देश-विदेश के नामी कंपनी हिस्सा लेवत हे। स्वास्थ्य के क्षेत्र म मानव संसाधन अउ अन्य सेवा प्रदाता कंपनी मन ह घलो इहां अपन स्टाल लगाए हे। प्रदेश के कई बड़े अस्पताल अउ निजी मेडिकल कॉलेज के संग अउ अनेक जिला के मुख्य चिकित्सा अउ स्वास्थ्य अधिकारी कार्यालय कती ले घलो ईहां स्टॉल लगाए गए हे।
स्वास्थ्य मंत्री श्री सिंहदेव ह हेल्थ एक्सपो के अवलोकन के बेरा इहां प्रदर्शित मेडिकल अउ लैब उपकरण के उपयोग, कीमत अउ खासियत के जानकारी लिस। ओ ह मशीन के डेमो घलो देखिस। श्री सिंहदेव ह जम्मो स्टॉल मे जाके मेनुफेक्चरर्स, सप्लायर अउ सेवा प्रदाता कंपनि के प्रतिनिधिय मन से चर्चा घलो करिस। ओ ह एक्सपो म भाग लिये वाले जम्मो कंपनी ल धन्यवाद देत हुए कहिस कि ईहां एक छत के तरी आने आने प्रकार के मेडिकल उपकरण अउ मशीन के बारे म जानकारी मिलत हे। अस्पताल म उपयोग होए वाले अलग-अलग कंपनि के उपकरण के डेमो घलो ईहां देखे जा सकत हे। 
स्वास्थ्य मंत्री ह एक्सपो म भाग लेवत कंपनी से कहिस कि प्रदेश म मेडिकल उपकरण, कन्ज्युमेबल्स अउ दवई के आपूर्ति ब मेनुफेक्चरर अउ सप्लायर फ्रेंडली व्यवस्था बनाए के दिशा म सरलग काम करे जाथ हे। एकर से एमन के आपूर्ति मे तेजी आए के संग ही स्वास्थ्य विभाग ले जुड़े वेंडर्स ल घलो सहुलियत होही। श्री सिंहदेव के हेल्थ एक्सपो के भ्रमण के बेरा स्वास्थ्य विभाग के आयुक्त डॉ. सी.आर. प्रसन्ना अउ इंडियन मेडिकल एशोसिएशन के अध्यक्ष डॉ. राकेश गुप्ता घलो संग रहिस हे।