तिल्दा-नेवरा, 29 अगस्त 2020। तिल्दा विकासखंड के ग्राम चांपा म भूख ले 10 गाय के मउत होगे। उहें 6 गाय गंभीर रूप ले घायल अवस्था म पड़े मिलिस। गाय मन के मउत के खबर के बाद घलो मउका म न पशु चिकित्सक के दल पहुंचे हे अउ न ही जनपद पंचायत के कोनो अधिकारी पहुचे हे। गाय मन के मउत कब होइस येला कोई नइ बता पावत हे। तिल्दा ले 8 किलोमीटर दुरिहा ग्राम पंचायत चांपा के गौठान म लगभग 90 गाय रखे गे रिहिस। गाँव वाले के माने ता सबो गाय पिछु 1 सप्ताह ले भी जादा समय ले लहकत रिहिस है। इहा गाय बर न ही चारा हे अउ न ही उकर मन के रहे बर पर्याप्त शेड के व्यवस्था हे। जेन कच्चा शेड बनाये गे रिहिस ओहा हवा म उड़ गए रिहिस। एकर सेती अब गाय खुला बदर के नीचे म पिछु सात-आठ दिन से लाघन रहत रिहिस हे।
पिछु 36 घंटा ले लगातार होवत बारिश म गाय भीगत रिहिस। लेकिन कोनो ह सुध नइ लीस। गौठान के दरवाजा बंद होय के कारण मवेशी नइ निकल पाईस अउ तेज बारिश म भीगत रहिस। लगातार भीगे ले गाय मन ठंड ल नई सह सकिस अउ भूखा रहे के सेती उकर मउत होगे।
