- मनरेगा के पहिली 3 महिना के मजदूरी बर 1016 करोड़ रूपिया लउहे जारी करे के करिन अनुरोध
- मनरेगा म 484 करोड़ रूपिया के मजदूरी भुगतान लंबित
- ए उलट परिस्थिति म लंबित मजदूरी के भुगतान तुरंते जरूरी
रायपुर, 03 अप्रैल 2020। मुख्यमंत्री श्री भूपेश बघेल ह प्रधानमंत्री श्री नरेंद्र मोदी ल चिट्ठी लिखके महात्मा गांधी राष्ट्रीय ग्रामीण रोजगार गारंटी योजना के अंतर्गत वित्तीय साल 2020-21 के पहिली 3 महिना के मजदूरी एक हजार 16 करोड़ रूपिया के राशि केन्द्र ले लउहे जारी करे के आग्रह करे हें।
मुख्यमंत्री श्री बघेल ह अपन चिट्ठी म लिखे हें के महात्मा गांधी राष्ट्रीय ग्रामीण रोजगार गारंटी योजना ग्रामीण अर्थव्यवस्था के आधारभूत संगठक मन म ले एक महत्वपूर्ण घटक ये। छत्तीसगढ़ म ये योजना के अंतर्गत पंजीकृत 39 लाख 56 हजार परिवार के 89.20 लाख श्रमिक मन म ले 32 लाख 82 हजार परिवार के 66 लाख 5 हजार श्रमिक सक्रिय रूप ले योजना के माध्यम ले रोजगार प्राप्त करत हें। महिना मार्च 2020 के चालू म राज्य म करीबन 12 लाख श्रमिक रोजेच योजना अंतर्गत काम करत रहिन। पाछू 10 दिन ले कोरोना वायरस के संक्रमण म बरते जात सावधानी मन के सेती श्रमिक मन के संख्या बहुत कम हो गए हे।
मुख्यमंत्री ह कहे हें के राज्य शासन कोति ले कोरोना वायरस ले बचाव बर जम्मो जरूरी उपाय जरूरी रूप ले ठउका करत अइसन काम विशेषकर मनखे मूलक अउ आजीविका संवर्धन ले संबंधित काम जेमा बड़ संख्या म श्रमिक एके जगा म झन सकलावय अइसे काम स्वीकृत करके श्रमिक मन ल मांग के आधार म भरपूर रोजगार उपलब्ध कराए बर जिला कार्यक्रम समन्वयक ल निर्देशित करे गए हे जेखर से गांव वाले मन के आजीविका सुरक्षित होवय।
मुख्यमंत्री ह कहे हें के श्रमिक मन ल समय म भुगतान नइ मिले के सेती घलोक उमन काम म नइ आहीं, ये एक बड़का कारन हे। उमन प्रधानमंत्री ल अवगत कराए हें के अभी हाल म ये योजना के अंतर्गत छत्तीसगढ़ म 484 करोड़ रूपिया के मजदूरी भुगतान लंबित हे। ए उलट परिस्थिति म ये लंबित मजदूरी के भुगतान तुरंत करे जाना जरूरी हे। संगेच अवइया महीना मन म समयबद्ध मजदूरी भुगतान ठउका करे बर वित्तीय साल 2020-21 के राज्य बर पहिली त्रैमास बर स्वीकृत लेबर बजट 534.73 लाख मानव दिवस के मजदूरी, राज्य बर स्वीकृत दैनिक मजदूरी दर 190 के मान ले कुल राशि 1016 करोड़ राज्य ल लउहे जारी करे के अनुरोध करे हैं।