नोवल कोरोना वायरस के संक्रमण ले बचाव बर आंगनबाड़ी कार्यकर्ता अऊ सहायिका घर-घर जाके हितग्राही मन ल करत वितरण
धमतरी, 31 मार्च 2020। नोवल कोरोना वायरस के संक्रमण ले बचाव बर जिला के सबो 1103 आंगनबाड़ी मन के 3 ले 6 साल तक के 18,974 लइका मन ल रेडी-टू-ईट पैकेट के वितरण आज करे गीस। जिला कार्यक्रम अधिकारी, महिला अउ बाल विकास विभाग श्री एम.डी.नायक ह बताइस के पाछू 24 मार्च के एक हफ्ता बर अऊ आज अवइया एक हफ्ता बर आंगनबाडी कार्यकर्ता अऊ सहायिका मन के संग हितग्राही लइका मन के घर-घर जाके रेडी-टू-ईट के वितरण करे गीस। उमन बताइस के अवइया 07 अप्रेल के सबो 06 महिना ले 03 साल, 03 ले 06 साल तक के लइका अऊ गर्भवती अउ शिशुवती माता मन ल एक महिना के रेडी-टू-ईट पैकेट्स के वितरण करे जाही।
श्री नायक ह बताइस महिला स्व सहायता समूह मन कोति ले कि रेडी-टु-ईट तियार करत बेरा मूड़ अउ मुह ल बांधके अऊ हाथ म ग्लब्स पहिरके स्वच्छता के पालन करे जात हे। संगेच आंगनबाड़ी कार्यकर्ता अउ सहायिका कोति ले घलोक मास्क लगाके, मास्क नइ होए के स्थिति म वैकल्पिक मास्क गमछा बांधके, हाथ म ग्लब्स नइ होए म हाथ ल साबून ले बने सहिन धोके हितग्राही मन ल रेडी-टू-ईट पैकेट के वितरण करे जात हे। पैकेट वितरण के समय ये घलोक ध्यान देहे जात हे के हितग्राही मन ले दू मीटर के दूरी म रहिके वितरन करे जाए।
