12 साल के बच्चा के पानी टंकी म डूबे ले होइस मउत

डौंडी, 26 जुलाई 2020। शनिवार के जुन्ना रेलवे बेस कैंप के तिर स्थित 9 फीट गहरा जुन्ना पानी टंकी म डूबे ले 12 साल के एक बच्चा के मउत होगे। मामला म पुलिस ह मर्ग कायम कर ले हे। थाना प्रभारी अनिल ठाकुर के अनुसार डौंडी जवाहर पारा निवासी  शिवचरण उर्फ अंगद भूआर्य अपन बच्चा मन के संग खेत म धान के रोपा लगाये बर गे रिहिस। मंझनिया खाना खाये बर उंखर 12 साल के इकलौता बेटा खिलेंद्र कुमार हाथ मुंह धोय बर खेत ले कुछ दूर म स्थित रेलवे बेस कैंप के जुन्ना पानी टंकी म गे रिहिस। अंदेसा लगाये जावत हे कि हाथ मुँह धोय के बेरा ओखर पैर फिसले के सेती वो 9 फीट गहरा टंकी म गिरगे। जेखर सेती ले ओखर डूबे ले मउत होगे। बताये जावत हे कि जोन टंकी म बच्चा डूबिस ओमा 6 फीट तक पानी भरे रिहिस।