राज्य के 1242 गौठान होइस स्वावलंबी: रायगढ़ जिला म स्वावलंबी सबले जादा 141 गौठान

रायपुर, 27 अगस्त 2021। छत्तीसगढ़ सरकार के फ्लैगशिप योजना मन म ले महत्वपूर्ण सुराजी गांव योजना के गरूवा घटक के तहत अब तक राज्य म बने अऊ सक्रिय रूप ले संचालित 5963 गौठान मन म ले 1242 गौठान स्वावलंबी हो गए हे। स्वावलंबी गौठान गोबर खरीदी ले लेके वर्मी कम्पोस्ट के निर्माण बर खुदे के उपलब्‍ध राशि के उपयोग होए लगे हे। रायगढ़ जिला म सबले जादा 189 गौठान स्वावलंबी होए हे। दूसर नंबर कबीरधाम जिला म 141 गौठान अऊ तीसर कड़ी म राजनांदगांव जिला म 101 गौठान स्वावलंबी होए हे।
कृषि विभाग ले मिले जानकारी के मुताबिक गरियाबंद जिला म 25, धमतरी म 43, बलौबाजार म 49 अऊ रायपुर जिला म 25 कबीरधाम जिला म 141, दुर्ग म 64, बालोद म 30, बेमेतरा म 22, राजनांदगांव जिला म 101, कोरबा म 61, गौरेला-पेण्ड्रा-मरवाही म 25, जांजगीर-चांपा म 44, बिलासपुर म 34, मुंगेली म 20, रायगढ़ म 189, कोरिया म 23, जशपुर म 36, बलरामपुर म 18, सरगुजा म 39, सूरजपुर म 22, कांकेर म 69, कोण्डगांव म 21, दंतेवाड़ा म 29, नारायणपुर म 5, बस्तर म 26, बीजापुर म 12 अऊ सुकमा जिला म 18 गौठान स्वावलंबी बन गए हे।
जानबा हे के राज्य म पशुधन के संरक्षण अऊ संवर्धन ल बढ़ावा देहे बर राज्य सरकार कोति ले अब तक 10107 गांव मन म गौठान के निर्माण के स्वीकृति देहे गए हे। जेमां ले 5963 गौठान मन के निर्माण पूरा हो चुके हे अऊ उहां गोबर खरीदी, वर्मी कम्पोस्ट के निर्माण संग आन आयमूलक गतिविधि मन के संचालन होवत हे। वर्ममान म 3220 गौठान मन के तेजी ले निर्माण कराए जात हे बांचे 924 गौठान मन के निर्माण के काम अभी शुरू होवइया हे। गौठान मन म पशुधन के देखरेख, चारा-पानी अऊ उपचार के व्यवस्था सुनिश्चित करे गए हे। मुख्यमंत्री के मंशा के मुताबिक गौठान मन म मवेशी मन बर हरियर चारा के इंतजाम घलोक करे जात हे। अब तक 4 हजार ले जादा गौठान मन म करीबन 7600 एकड़ म हरियर चारा लगाए गए हे, जेमां हाईब्रिड नेपियर घास के रोपण अऊ आन चारा के बोंआई करे गए हे।