कांकेर, मुख्यमंत्री श्री भूपेश बघेल ह आज मंझनिया ल कांकेर जिला के विकासखंड मुख्यालय चारामा म भगवान बिरसा मुंडा के करीबन 15 फीट ऊंच प्रतिमा के अनावरण करिन। चारामा ले कोरर मार्ग म दरगहन चौक म आदिवासी समाज कोति ले भगवान बिरसा मुंडा के मूर्ति के स्थापना करे गए हे। ये बेरा म मुख्यमंत्री ह विधिवत पूजा अर्चना करत मूर्ति के अनावरण करिन। संगेच क्षेत्रवासी मन ल बधाई देवत समाज के गौरव बिरसा मुंडा के सुरता कर के उंखर मूर्ति म फुल के हार चढ़ाईन। एखर अलावा मुख्यमंत्री श्री बघेल ह परिसर म कदंब के पौधा तको लगाइन। ये बेरा म विधानसभा के उपाध्यक्ष श्री मनोज सिंह मंडावी, सर्व आदिवासी समाज के जिलाध्यक्ष श्री जीवन ठाकुर, गोंडवाना समाज के जिलाध्यक्ष श्री मानक दरपट्टी, चारामा अध्यक्ष श्री रैनसिंह कांगे, सर्व आदिवासी समाज चारामा अध्यक्ष श्री गौतम कुंजाम, समाज प्रमुख श्री ठाकुर राम कश्यप संग आदिवासी समाज के वरिष्ठ पदाधिकारीगण उपस्थित रहिन।
मुख्यमंत्री ह दानदाता के करिस सम्मान:- ये बेरा म मुख्यमंत्री श्री भूपेश बघेल ह दरगहन चौक म बिरसा मुंडा के मूर्ति के स्थापना बर जमीन दान म देवइया जोशी परिवार के सम्मान शाल अऊ श्रीफल भेंट करके करिन। परिवार कोति ले वयोवृद्ध श्री चंद्रकांत, श्रीमती हरिप्रिया जोशी ह मुख्यमंत्री के हाथ सम्मानित होइन। ये बेरा म मुख्यमंत्री ह नान्हें बालिका कु. तनुश्री जोशी के संग भेंट कर के फोटू घलोक खिंचाईन।
