एक करोड़ देहे के परगे हाँका -ये भाजपा नेता ह फेर निकाल दिस हर खाता म 15 लाख रुपिया के जिन्न
एक ठो बयान म रामविचार नेताम ह कहिन कि प्रधानमंत्री अउ राष्ट्रीय अध्यक्ष ह कभू कोनो मच ले 15 लाख रुपिया हर मनखे के खाता म डारे के घोषणा नइ करे हे।
धमेन्द्र निर्मल के सार समाचार, लोकसभा चुनइ 2014 के पहिली खूब चर्चा में रिहिसे के हर खाता म 15 लाख रुपिया डारे के जिन्न ह लोकसभा चुनई 2019 केे पहिली फेर निकल गे हे। छत्तीसगढ़ बीजेपी के बड़का नेता, पूर्व मंत्री अउ राज्यसभा सांसद राम विचार नेताम हं ये जिन्न ल फेर निकाल दिए हावय। एक ठन बयान म रामविचार नेताम ह कहिन कि प्रधानमंत्री अउ राष्ट्रीय अध्यक्ष ह कभू कोनो मंंच ले 15 लाख रुपिया हर मनखे के खाता म डारे के घोषणा नइ करे हे।
रामविचार नेताम ह ललकारत कहिन कि 15 लाख रुपिया हर मनखे के खाता म डारे के बात प्रधानमंत्री अउ राष्ट्रीय अध्यक्ष के बयान के 24 घंटा के भीतर
प्रत्यक्ष प्रमाण प्रस्तुत करइया ल भारतीय जनता पार्टी 1 करोड़ के इनाम देही। रामविचार नेताम के अइसन बयान के पाछू रजवाड़ी हलचले बाढ़ गे हे। कांग्रेसिया मन डाहर ले सरलग आरोप लगाए जावत हे। अइसना म ये जानना जरूरी हे कि एक पइत फेर 15 लाख रुपिया हर खाता वाले जिन्न के निकलइया रामविचार नेताम के रजवाड़ी रूतबा आखिर का हे ?
छत्तीसगढ़ बीजेपी के बड़का आदिवासी नेता रामविचार नेताम सरलग पांच पइत विधायक अउ राज्य सरकार म दू पइत मंत्री रहिगे हावय। नेताम साल 1990 म
पहिली घाँव सरगुजा के पाल सीट ले विधाक बनिस ओकर पीछू 2013 तक सरलग विधायक हे। ये दारी साल 2003 ले 2008 अउ 2008 ले 2013 तक के राज्य सरकार म मंत्री रहिन फेर 2013 के विधानसभा चुनई म बलरामपुर सीट ले कांग्रेस के बृहष्पति सिंह ल चुनई हार गे। ओकर पीछू साल 2016 म उन मन छत्तीसगढ़ के बाँटा ले राज्यसभा सांसद निर्वाचित होए हावे।
चटकारा:-
दरपन म अपन ददा के दू फोटू देखके
बंठा:- हमर दू दू झन ददा, हमर दू दू झन ददा।
जेठिया:- कस रे रोगहा तोला लाज नइ लगय रे ! कुछू भी बोलत रहिथस।
बंठा:- का करबे दाई ! चमड़ा के जुबान के तोपना न ढँकना फिसल जथे।
जेठिया:- तबले अइसन नइ गोठियावय बेटा ! कभू कभू हाँसन बत्तीसी हँ फाँसन बत्तीसी हो जथे।