रइपुर 21 अप्रैल 2021 बुधवार । मुख्यमंत्री दाउ भूपेश बघेल ह घोषणा करीन हे कि छत्तीसगढ़ म 18 बछर ले उपरहा उमर के लोगन मन ल फोकट म कोरोना वैक्सीन लगाए जाही । 18 बछर ले उपरहा उमर के लोगन मन के टीकाकरण के भुगतान राज्य सरकार करही। मुख्यमंत्री दाउ बघेल ह कहीन कि अपन नागरिक मन के जीवन रक्षा बर हम हरसंभव कदम उठाइंगे। मुख्यमंत्री दाउ बघेल ह कहीन कि केंद्र सरकार ले अनुरोध करे गे हवय कि छत्तीसगढ़ म पर्याप्त संख्या म वैक्सीन के उपलब्धता सुनिश्चित करैं।
मुख्यमंत्री दाउ बघेल ह कोविड टीकाकरण बर पात्र सबो हितग्राही मन ले अपील तको करीन हे उन्मन कहूं अब तक टीकाकरण नइ कराए होही त बजुर करा लेवयं, जेकर ले उन संक्रमण ले होवइया गम्भीर बीमारी ले बाच सकैं।
जानबा होवय कि 45 बछर ले उपरहा आयु समूह ल कोविड 19 वैक्सीन के पहिली डोज़ देहे म छत्तीसगढ़ राज्य के जगा ह जम्मा देश म चौथइया हवय। कहूं साठ बछर अउ ओकर ले उपरहा आयुवर्ग के बात करीन त छत्तीसगढ़ पूरा देश म लद्दाख, राजस्थान, सिक्किम अउ त्रिपुरा के पीछू पाँचवा जगा म हवय। 88 प्रतिशत हेल्थ केयर वर्कर, 92 प्रतिशत फ्रंट लाइन वर्कर ल तको वैक्सीन के पहिली खुराक देहे जा चुके हवय। छत्तीसगढ़ म अभीन तक 51 लाख 25 हज़ार 640 कोरोना वैक्सीन के डोज़ के उपयोग करे गे हवय । प्रदेश म अभीन तक अल्ली अउ दूल्ली मिलाके कुल 50 लाख 55 हजार 698 डोज लगाए जा चुके हवयं।
