रायपुर, 04 जून 2020। कोरोना के चलत जारी लॉकडाउन म दूसर राज्य म फंसे मजदूर मन ल ही ज्यादा परेशानी झेलना पड़े हे, लेकिन अब धीरे-धीरे स्थिति ठीक होवत हे. बेंगलुरु म फंसे छत्तीसगढ़ के 11 जिला के 180 गरीब मजदूर विशेष विमान ले रायपुर पहुंचे हे. रायपुर पहुंचे के बाद सबो मजदूर मन ल बस के माध्यम ले उंखर गृह जिला ले जाये जावत हे, जहां उमन ल क्वारंटाइन सेन्टर मन म रखे जाही.
जानकारी के अनुसार विशेष विमान क्रमांक 9405 बेंगलुरु ले बिहनिया 8 बजे रवाना होके बिहनिया 9:50 बजे रायपुर के स्वामी विवेकानंद विमानतल पहुंचीस. अइसने 5 जून के 174 श्रमिक अउ आही. जोन मजदूर मन ल हवाई जहाज ले छत्तीसगढ़ के राजधानी रायपुर एयरपोर्ट म लाये गये हे. ओमा बलौदाबाजार के 17, बलरामपुर 19, बिलासपुर 9, जशपुर 1, जांजगीर-चापा 95, कोरिया 2, कोरबा 8, महासमुंद 13, नारायणपुर 7, पेंड्रा-गौरेला 7, सरगुजा 2 सहित 180 मजदूर शामिल हे.