- 6556 जरूरतमंद श्रमिक मन के खाता म 19.12 लाख रूपिया करे गीस जमा
- देश के 20 राज्य अउ चार केन्द्र शासित प्रदेश म फंसे हे छत्तीसगढ़ के प्रवासी श्रमिक
रायपुर, 15 अप्रैल 2020। लॉकडाउन ले प्रभावित छत्तीसगढ़ प्रदेश के आन राज्य मन म फंसे प्रवासी श्रमिक मन बर मुख्यमंत्री श्री भूपेश बघेल के पहल अउ हुकुम म राज्य सरकार ह 14 अप्रैल संझा 4 बजे तक संकटग्रस्त 64 हजार 416 श्रमिक मन ल भोजन, ठहरे अऊ चिकित्सा सुविधा संग आन जरूरी व्यवस्था सुनिश्चित करके ओ मन ल राहत पहुंचाए हे। एमां ले जरूरतमंद छै हजार 556 श्रमिक मन के खाता म तत्कालिक व्यवस्था बर करीबन 19 लाख 12 हजार रूपिया घलोक जमा करवाए गए हे। छत्तीसगढ़ के श्रमिक देश के 20 आन राज्य अउ चार केन्द्र शासित प्रदेश मन म संकट के स्थिति म होए के संबंध म जानकारी मिले रहिस हे।
श्रम विभाग के अधिकारी मन ह आज इहां बताइन के छत्तीसगढ़ शासन कोति ले संकटग्रस्त 6556 श्रमिक मन ल राहत पहुंचाए बर तात्कालिक व्यवस्था के रूप म जिला बेमेतरा के 4879 श्रमिक मन के खाता म 15 लाख 45 हजार रूपिया, मुंगेली जिला के 1483 श्रमिक मन के खाता म एक लाख 73 हजार रूपिया अऊ कबीरधाम जिला के 194 श्रमिक मन के खाता म प्रति श्रमिक 1000 रूपिया के मान ले एक लाख 94 हजार रूपिया जमा कराए गए हे।
जानबा हे के छत्तीसगढ़ सरकार कोति ले देश के आन राज्य मन म श्रमिक मन के समस्या के जल्दी निराकरण बर अधिकारी मन के दल गठित करके सतत् निगरानी करे जात हे। एखर बर श्रम विभाग कोति ले राज्य स्तर म हेल्पलाईन नम्बर 0771- 2443809, 91098-49992, 75878-22800 संग जिला स्तर म घलोक हेल्पलाईन नम्बर स्थापित करे गए हे। हेल्पलाईन नम्बर के माध्यम ले मिले श्रमिक मन के समस्या मन ल पंजीबद्ध करके तुरंत यथासंभव समाधान करे जात हे। मुख्यमंत्री के हुकुम म श्रम विभाग के सचिव श्री सोनमणी बोरा के मार्गदर्शन म आन प्रदेश के स्थानीय प्रशासन ले सतत् समन्वय कर श्रमिक मन के समस्या मन के यथाशीघ्र समाधान करे जात हे।
