रायपुर, 6 दिसम्बर 2020। छत्तीसगढ़ म पहली घाव वर्चुअल मैराथन दौड़ के आयोजन 13 दिसम्बर के करे जावत हे। ए दौड़ म शामिल होए बर 4 दिसम्बर ले पंजीयन शुरू होगे हे। एखर बर सबो वर्ग के लोगन म अच्छा-खासा उत्साह देखे बर मिलत हे। एमा पंजीयन के शुरू होवत ही 24 घण्टा के भीतर 19 हजार लोगन ह ऑनलाइन रजिस्ट्रेशन कराए हे। राज्य म नवा सरकार के गठन के दू बछर पूरा होए के अवसर म आयोजित ए वर्चुअल मैराथन म अब तक जांजगीर चांपा जिला ले 1584, बालोद ले 767, बलौदाबाजार-भाटापारा ले 829, बलरामपुर-रामानुजगंज ले 222, बस्तर म 554, बेमेतरा म 483, बीजापुर म 462 अऊ बिलासपुर म 903 लोगन ह रजिस्ट्रेशन कराए हे। इही तरह दक्षिण बस्तर दंतेवाड़ा ले 210, धमतरी ले 622, दुर्ग ले 1946, गरियाबंद ले 394, गौरेला-पेण्ड्रा-मरवाही ले 152, अऊ जशपुर ले 525 लोगन ह रजिस्ट्रेशन कराए हे। एखर अलावा उत्तर बस्तर कांकेर ले 257, कवर्धा ले 577, कोण्डागांव ले 167, कोरबा ले 843, कोरिया ले 548, महासमुंद ले 999, मुंगेली ले 433 अऊ नारायणपुर ले 124 लोगन ह रजिस्ट्रेशन कराए हे। इही तरह रायगढ़ ले 1018, रायपुर ले 1609, राजनांदगांव ले 1079, सुकमा ले 215, सूरजपुर ले 713 अऊ सरगुजा ले 364 लोगन ह ऑनलाइन रजिस्ट्रेशन कराए हे।
वर्चुअल मैराथन दौड़ बर प्रतिभागी कहीं भी समूह के रूप म एकत्रित नई होही। प्रतिभागी घर, उद्यान, मैदान, सड़क या अन्य कोनो सुरक्षित स्थान म सोशल डिस्टेंसिंग के पालन करत दौड़ही अऊ दौड़त हुए कुछ सेकेण्ड के वीडियो, फोटो 13 दिसम्बर के बिहनिया 6 बजे ले 11 बजे तक हैशटैग के संग फेसबुक व ट्वीटर म अपलोड कर सकही। खेल अऊ युवा कल्याण विभाग द्वारा प्रदेशवासी मन ले कोविड-19 के नियम मन के पालन करत हुए वर्चुअल मैराथन दौड़ के सफल आयोजन म सहभागी बने के अपील करे गिस हे।
उल्लेखनीय हे कि इच्छुक प्रतिभागी खेल अऊ युवा कल्याण विभाग तथा जनसम्पर्क विभाग के वेबसाइट http://www.sportsyw.cg.gov.in अऊ http://jansamprak.cg.gov.in अऊ http://dprcg.gov.in म 10 दिसम्बर तक पंजीयन करा सकत हे। राज्य के प्रत्येक जिला म प्रथम 300 ले 500 तक पंजीयन करइया प्रतिभागी मन ल टीशर्ट प्रदान कर ओमन ल प्रोत्साहित करे जाही। रजिस्ट्रेशन लिंक म वर्चुअल मैराथन दौड़ बर छत्तीसगढ़ शासन द्वारा अधिकृत लोगन अऊ स्लोगन के तस्वीर घलो ऑनलाईन उपलब्ध हे। वर्चुअल मैराथन दौड़ म भाग लेने वाला प्रतिभागी प्रिंटआउट निकाल के अपन सफेद रंग के टी-शर्ट म चिपका के दौड़त हुए वीडियो अऊ फोटो लेके हैशटैग कर सकत हे।
