राजधानी के इंडोर स्टेडियम म 200 बिस्तर के आइसोलेशन सेंटर तइयार, बिना लक्षण वाला मरीज रखे जाही

रायपुर, 18 जून 2020। छत्तीसगढ़ म कोरोना संक्रमित मन के बढ़त संख्या के बीच स्वास्थ्य विभाग नवा जोश के संग लड़े बर तइयार होगे हे. एखर बर सुविधा मन म विस्तार करत हुए राजधानी के इंडोर स्टेडियम म 200 बिस्तर के आइसोलेशन हॉस्पिटल तइयार करे गे हे, जिहां बिना लक्षण वाला मरीज मन ल रखे जाही. इंडोर स्टेडियम म बनाये गे आईसोलेशन हॉस्पिटल म कोरोना संक्रमण ल देखत हुए सरकार डहर ले जारी एडवायजरी के ध्यान रखे गे हे. हॉस्पिटल म साउंड सिस्टम, टीवी, पंखा, मोबाइल प्लग, योगा स्थल, जिम अउ मनोरंजन बर चेस, केरम, लुडो के व्यवस्था करे गे हे. संग ही स्वस्थ मनोरंजन बर प्रेरणा स्त्रोत, ज्ञानवर्धक फिल्म दिखाये के घलो व्यवस्था करे गे हे. आइसोलेशन हॉस्पिटल महिला अउ पुरुष मन बर बनाए गे अलग-अलग सेक्शन, अधिकारी, कर्मचारी अउ मेडिकल स्टॉफ बर अलग व्यवस्था के निरीक्षण करे ल जिला चिकित्सा अधिकारी डॉ. मीरा बघेल पहुंचिस. ओ मन बताइस कि ये कोनो क्वारेंटाइन सेंटर नई हे, बल्कि ये आइसोलेशन हॉस्पिटल हे, इहां ओ सिम्टमेटिक कोरोना पॉजिटिव मरीज भर्ती होही, जो बिना लक्षण वाला मरीज होही या जो मरीज डेंजर जोन म नई होही, ओ मन ल इहां रखे जाही. जेखर ले वो बाहर रह के दूसर मन ल संक्रमित झन करे. डीपीएम मनीष कुमार ह बताइस की एडवायजरी के पालन करत हुए पूरा व्यवस्था तइयार करे गे हे. पूरा स्टेडियम ल अलग-अलग वार्ड मन म बांटे गे हे. महिला अउ पुरुष मन बर अलग सेक्शन, अधिकारी, कर्मचारी अउ मेडिकल स्टॉफ के अलग सेक्शन हे. सीसीटीवी के द्वारा सतत् निगरानी करे जाही. मेडिकल स्टाफ आवश्यक सामग्री मन के संग तैनात रही.