मुंगेली, 19 अगस्त 2020। मुंगेली जिला म पाछू कई दिन ले लगातार होवत बारिश के सेती ले पथरिया ब्लॉक स्थित आगर अउ मनियारी नदी उफान म हे. नदिया मन के उफान ले क्षेत्र म बाढ़ के स्थिति बने हे. जेखर ले अमोरा रावनभाटा म 23 लोगन मन फसगे रहिस हे. संझा होए के सेती ये लोगन मन ल नई निकाले जा सकिस. सबो मन रात भर बाढ़ म फंसे रहिस. जिला प्रशासन ह आज बिहनिया 7 बजे सबो ल सुरक्षित रेस्क्यू करिस.
बता देथन कि बाढ़ म अमोरा इलाका के रावणभाटा म लोगन मन फसे रहिस हे, जोन मनियारी नदिया ले चारो डाहर ले घिरे हे. इहां लोगन मन अपन खेत म सब्जी अउ धान के खेती करथे. उहां मंगलवार के अचानक जादा पानी आगे. ओ मन अपन जानवर मन ल बचाये के चक्कर म फसगे, बिहनिया 7 बजे रेस्क्यू करके 6 महिला, 4 बच्चा अउ 13 पुरुष कुल 23 लोगन मन ल सुरक्षित निकाले गिस.
