24 फ़रवरी 2022 रइपुर।मुख्यमंत्री दाउ भूपेश बघेल 25 फरवरी के बिलासपुर प्रवास के बेरा शहरिया मन ल तिफरा फलाईओवर ब्रिज, व्यापार विहार स्मार्ट रोड के दू ठिन बड़का सौगात देवइया हे। मुख्यमंत्री ये दूनों काम के लोकार्पण करही। इन्कर शुरु होय ले बेलासपुर-रइपुर मार्ग अउ बेलासपुर संभाग के सबसे बड़े व्यापारिक केंद्र व्यापार विहार म यातायात व्यवस्थित अउ सुगम होही। मुख्यमंत्री एकरे संग मनोरंजन अउ ज्ञान के केन्द्र के रूप म प्लेनेटोरियम के तको सौगात देही।
तिफरा छोर ले स्वर्गीय जमुना प्रसाद वर्मा कॉलेज तक 1620 मीटर के लाम तिफरा फ्लाई ओवर ब्रिज के निर्माण 107 करोड़ 49 लाख रूपिया ले नगरीय प्रशासन अउ विकास विभाग कोति ले करे गे हवय।
व्यापार विहार स्मार्ट रोड के होही लोकार्पण
बेलासापुर शहर म महाराणा प्रताप चौक ले तारबाहर चौक तक बिलासपुर स्मार्ट सिटी लिमिटेड कोति ले लगभग 26 करोड़ 83 लाख रूपिया में व्यवस्थित अउ आधुनिक सुविधा मन ले सुसज्जित स्मार्ट रोड के निर्माण करे गे हवय। येह संभाग के सबले बड़का व्यापारिक केंद्र हरे । इहां फोरलेन स्मार्ट रोड के बने ले व्यापार विहार म व्यापारिक परिवहन सहज अउ सुगम होही।
मनोरंजन अउ ज्ञान के केन्द्र प्लेनेटोरियम के मिलही सौगात
बेलासपुर स्मार्ट सिटी लिमिटेड कोति ले साढ़े तीन एकड़ म 6 करोड़ 77 लाख रूपिया में डॉ.एपीजे अब्दुल कलाम प्लेनेटोरियम के निर्माण करे गेे हवय। मुख्यमंत्री दाउ भूपेश बघेल 25 फरवरी के एकर लोकार्पण करही। येमे शहरवासी मन ल दिन म आकाशीय नज़ारा के अवलोकन के संगे संग विज्ञान अउ खगोलशास्त्र के बारे म महत्वपूर्ण जानकारी मिलही। दू सौ लोगन के बइठक वाले ये प्लेनेटोरियम म अवइया मन बर फोर के सिंगल टेक्नोलॉजी के प्रोजेक्टर लगाए गे हवय। एकर छोड़ प्लेनेटोरियम परिसर म ऑक्सीजोन के तको निर्माण करे गे हवय।
मुख्यमंत्री 25 फरवरी के बेलासपुर म करही तिफरा फलाईओवर ब्रिज अउ व्यापार विहार स्मार्ट रोड के लोकार्पण
