उदंती-सीतानदी टाइगर रिज़र्व मा वन विभाग अउ एंटी पोचिंग टीम ह मिल के एक बड़का कार्रवाई करे हें। वन्यजीव मन के सिकार करे के मामला मा तीन झन आरोपी मन ला गिरफ्तार करके जेल भेज देहे गे हे।
गरियाबंद, छत्तीसगढ़ के गरियाबंद अउ धमतरी जिला मा फइले उदंती-सीतानदी टाइगर रिज़र्व के कोर इलाका मा वन्यजीव सुरक्षा ला सबले जादा महत्व देहे जात हे। इहां खास करके संकट मा परे ‘वन भइँसा’ अउ बाघ मन ला बचाय बर प्रजनन केंद्र, गस्ती अउ मनखे मन के भागीदारी बरोबर उपाय करे जात हें। हाल ही मा पेरेग्रीन फाल्कन बरोबर दुरलभ चिरई मन के दिखना इहां के सुघर पर्यावरण के संकेत आय। उदंती-सीतानदी टाइगर रिज़र्व मा सुरक्षा ला अउ मजबूत करत वन विभाग अउ एंटी पोचिंग टीम ह सिकार मा सामिल तीन झन आरोपी मन ला धरे हे। ये कार्रवाई ‘अखिल भारतीय बाघ गणना 2026’ के सेती इलाका मा बढ़ाए गे बिसेस निगरानी के बखत करे गीस।
वन विभाग ले मिले जानकारी के मुताबिक, 15 जनवरी 2026 के दक्षिण उदंती परिक्षेत्र के नागेश बीट मा रोज के गस्त के समय छै झन संदेही मनखे मन ला हथियार के संग देखे गीस। तुरते कार्रवाई करत एंटी पोचिंग टीम ह घेराबंदी करके राजमन यादव ला मउका मा धर लीस। पूछताछ मा आरोपी ह स्वीकार करिस के ओ ह अपन साथी गुप्ताराम, भादुराम अउ ओडिशा के कुछु दूसर मनखे मन के संग मिल के प्रतिबंधित इलाका मा अवैध रूप ले डेरा डाले रहिस। जांच मा पता चलिस के 16 जनवरी 2026 के गोमारझरी नाला तीर पानी पिए बर आय जंगली सुअर मन के सिकार करिस। ओखर बाद मांस ला टांगापानी गाँव ले जा के आपस मा बाँट लीन।
टाइगर रिज़र्व के उपनिदेशक श्री वरुण जैन के मार्गदर्शन अउ गरियाबंद पुलिस के सहयोग ले 20 जनवरी 2026 के मुख्य आरोपी गुप्ताराम ला भूतबेड़ा बाजार ले गिरफ्तार करिस। आरोपी के घर ले एक ठन भरमार बंदूक, 3.100 किलो जंगली सुअर के मांस, भालू के पंजा अउ सिकार मा काम अवइया समान जपत करिस। उहें दूसर आरोपी भादुराम के घर ले वन्यजीव मन ला फँसाय के फंदा अउ क्लच वायर बरामद होइस।
रिकार्ड के जांच मा ये घलो पता चलिस के आरोपी मन पेसेवर सिकारी आयँ अउ मुख्य आरोपी के खिलाफ पहिली घलो वन्यजीव अपराध के मामला दर्ज हे। वन्यजीव (संरक्षण) अधिनियम के धारा मन के तहत कार्रवाई करत होइन तीनों आरोपी मन ला 22 जनवरी 2026 के मुख्य न्यायिक मजिस्ट्रेट, गरियाबंद के आगू पेस करिस, जेमां ले ओमन ला 13 दिन के न्यायिक रिमांड मा जेल भेज दिय गे हे। फरार आरोपी मन के खोजबीन जारी हे।
ये बात जानबा हे के वन मंत्री श्री केदार कश्यप के निर्देश मा प्रदेश मा वन अउ वन्यजीव के सुरक्षा ला पहिली प्राथमिकता देहे जात हे। ओखर मार्गदर्शन मा प्रधान मुख्य वन संरक्षक (वन्यप्राणी) श्री अरुण कुमार पांडेय के अगुवाई मा ‘एंटी स्नेर वॉक’ अभियान, सरलग गस्त अउ निगरानी ला मजबूत करे हे। इही कोसिस के फल आय के वन विभाग ह अवैध सिकार मा रोक लगावत हे अउ वन्यजीव मन के सुरक्षा पक्का करत हे।
