30वां किस्त मिले म बोलिस इंदरानी- हमार विष्णु भइया ह तिहार ले पहिली दीस उपहार
कबीरधाम, राखी के तिहार ददा-दाई के लइका अउ भाई-बहिनी के मया अउ भरोसा के तिहार ए। बहिनी मन जिहां अपन भाई मन के हाथ म मया अउ भरोसा के राखी बांधे के तियारी करत हवयं, उहें ए पइत कबीरधाम जिला के माईलोगन मन बर महतारी वंदन योजना के 30वां किस्त घलो खुसी के एक खास उपहार लेके आए हे। राखी ले ठीक पहिली खाता म पहुंचे एक हजार रूपिया के रासि ह राजानवागांव के इंदरानी मरकाम के मुंह म खुसी ला देहे हे।
महतारी वंदन योजना के 30वां किस्त मिले के खुसी जतावत इंदरानी मरकाम ह मुख्यमंत्री श्री विष्णुदेव साय ला मया ले ‘विष्णु भइया’ कहिथे। ओ हा कहिथे के हमार विष्णु भइया ह राखी तिहार के पहिलिच महतारी वंदन योजना के 30वां किस्त हमार खाता म डालके हम बहिनी मन ला उपहार देहे हे। एकर बर मय मुख्यमंत्री श्री विष्णुदेव साय जी ला धन्यवाद देवत हंव।
इंदरानी बर ए रासि सिरीफ बैंक खाता म आए एक हजार रूपिया के रकम नो हे, भलुक अपन छोटे-छोटे जरूरत मन ला काकरो ले मदद मांगे बिना पूरा करे के भरोसा ए। ओ हा बताथे के घर के जरूरी सामान लेना होय, लइका मन के छोटे जरूरत पूरा करे बर होय या अचानक कोई घरेलू खरचा आ जाय, महतारी वंदन के रासि भारी मददगार होथे। ओ हा कहिथे के पहिली छोटे-छोटे जरूरत बर घलो काकरो ले पइसा मांगे बर परत रहिस। अब हर महीना खाता म रासि आ जाथे, त अपन जरूरी सामान बर काकरो आगू हाथ फैलाए के जरूरत नई परै।
राखी ले पहिली रासि मिले ले इंदरानी के खुसी अउ बाढ़ गे हे। ओ हा कहिथे के अब कोई खास दिन या तिहार के अगोरा नई करे बर परै। हर महीना रासि आथे, ए पाए के जरूरत के बखत ओकर उपयोग कर लेथंव। अब त हरेक महीना ह तिहार सही लागथे। महतारी वंदन योजना के तहत पात्र बिहाव-भए माईलोगन मन ला हर महीना एक हजार रूपिया के आर्थिक सहायता सीधा बैंक खाता मन म देहे जाथे। सरलग आर्थिक सहयोग ले माईलोगन मन अपन खुद के जरूरत मन के संग परिवार के जरूरत मन म घलो योगदान दे पावत हवयं अउ ओ मन म अपन आप उपर भरोसा बाढ़त हे।
