कबीरधाम, 18 मई 2020। कोविड-19 के सेती लॉकडाउन म फंसे प्रवासी मजदूर मन ल राहत पहुंचात मुख्यमंत्री श्री भूपेश बघेल के हुकुम म कवर्धा जिला के धवईपानी अऊ पोल्मी बार्डर ले राज्य के सीमा तक पहुंचाए बर बस के व्यवस्था करे जात हे। आंध्रप्रदेश, तेलंगाना, महाराष्ट्र, उत्तरप्रदेश, मध्यप्रदेश, राजस्थान ले श्रमिक अऊ यात्री दुनों बार्डर ले लगातार आवत हें।
जिला प्रशासन ह मजदूर मन अउ यात्री मन ल लउहे पहुंचाए बर दूनो पोस्ट म बस के व्यवस्था करे हे। प्रवासी मजदूर मन ल सुरक्षित ले जाय बर लगाए गए सबो बस मन ल सेनेटाइजर करे जात हे। मजदूर मन के सहायता बर हेल्प काउंटर बनाय गे हे। आन राज्य मन ले अवइया मजदूर मन के सहायता बर केन्द्र बनाये गे हे, ताकि अपन गांव जवइया बस मन के सही जानकारी ओ मन ल मिल सकय। धवईपानी अउ पोल्मी बार्डर म मजदूर मन बर नास्ता अउ पेयजल के निशुल्क व्यवस्था करे गए हे। चेक पोस्ट म ऊंखर स्वास्थ्य परीक्षण बर काउंटर बनाय गए हे। एखरे संग पुलिस सहायता केन्द्र म मजदूर मन ल जानकारी के संग मदद तको करे जात हे। मजदूर मन के पंजीयन बर काउंटर बनाय गे हे। प्रवासी मजदूर मन ल राज्य के सीमा तक अउ छत्तीसगढ़ के मजदूर मन ल ऊंखर जिला मन तक पहुंचाए बर करीबन 34 बस लगे हे।