रायपुर, 36 वें राष्ट्रीय खेल म छत्त्तीसगढ़ के खिलाड़ी मन ह शानदार खेल के प्रदर्शन करत राज्य बर अब तक 2 गोल्ड संग 7 पदक जीते हें। आज होए महिला सॉफ्ट टेनिस के मुकाबला म खिलाड़ी मन ह अपन उम्दा खेल के प्रदर्शन करत राज्य बर एक अऊ पदक पक्का कर लीन। गुजरात म आयोजित राष्ट्रीय खेल म आज राज्य के महिला सॉफ्ट टेनिस टीम ह मध्यप्रदेश के दुसरा वरीयता प्राप्त टीम ल हराके सेमीफाइनल म प्रवेश कर लेहे हे। पहिली डबल्स मैच म छत्तीसगढ़ के मेघा बंजारे अऊ संजना टांक ह मध्यप्रदेश के सुजिता अऊ अंशिका ल टाईब्रेक म 4-4(7-3) ले पराजित करके टीम ल 1-0 के बढ़त दिला दीस।
दूसर सिंगल स्पर्धा म छत्तीसगढ़ के त्रिवेणी सौनकर मध्यप्रदेश के अंतर्राष्ट्रीय खिलाड़ी आदया तिवारी ले 0-5 ले हार गीस। दुनों पक्ष के स्कोर स्कोर 1-1 हो गीस। तीसर डबल्स मैच म छत्तीसगढ़ के उर्वशी बंजारे अऊ निधि डोंगरे ह मध्यप्रदेश के नंदनी अऊ अनुष्का ल 5-2 ले हराके छत्तीसगढ़ टीम ल 2-1 के निर्णायक बढ़त दिला दीस। एखर संगेच महिला सॉफ्ट टेनिस टीम सेमीफाइनल म पहुंच गीस। उहें छत्तीसगढ़ के आजिंक्या सिंह ह वुमेंस 50 मीटर बेक स्ट्रोक तैराकी स्पर्धा म 32.42 सेकंड के समय निकाल के फाइनल बर क्वालीफाई करिस। ये स्पर्धा के फाइनल काल होही। महिला सॉफ्ट टेनिस खिलाड़ी मन के ये सफलता म सॉफ्ट टेनिस संघ के अध्यक्ष अनिल पुसदकर संग खेल पदाधिकारी मन ह बधाई देहे हें।
36 वां राष्ट्रीय खेल: छत्तीसगढ़ बर एक अऊ पदक पक्का
