पुरुष वर्ग के टीम ल मिलीस रजत पदक
महिला वर्ग के टीम ह जीतिस कांस्य पदक
रायपुर, नेशनल गेम म आज छत्तीसगढ़ ल दू पदक मिले हे। पुरूष सॉफ्टबाल टीम ल रजत अऊ महिला सॉफ्टबाल टीम ल कांस्य पदक प्राप्त होय हे। मुख्यमंत्री श्री भूपेश बघेल अऊ खेल अउ युवा कल्याण मंत्री श्री उमेश पटेल ह दुनों टीम के खिलाड़ी मन ल ये सफलता बर बधाई अऊ शुभकामना देहे हें। गुजरात म आयोजित राष्ट्रीय खेल म छत्तीसगढ़ के टीम अब तक 2 गोल्ड, 5 सिल्वर अऊ 6 कांस्य पदक जीते हे।
छत्तीसगढ़ महिला सॉफ्टबाल टीम के मुकाबला आज सेमीफाइनल म केरल के संग होइस। ये संघर्षपूर्ण मुकाबला म छत्तीसगढ़ के टीम केरल के टीम के 2-1 ले पीछू रहि गे अऊ टीम ल कांस्य पदक ले ही संतोष करना परिस। जानबा हे कि सीनियर वर्ग के राष्ट्रीय चैंपियनशिप म महिला वर्ग के टीम ल पहली पईत पदक प्राप्त होय हे। एखर ले पहिली महिला वर्ग के टीम एक पईत संघरा तीसर स्थान म रहे हे।
फाइनल मैच म आज पुरुष वर्ग सॉफ्टबाल टीम के मुकाबला छत्तीसगढ़ अऊ महाराष्ट्र के बीच होइस। तीसर इनिंग तक दुनों टीम बराबरी म रहिन। चौथइया इनिंग म महाराष्ट्र एक रन ले आगू हो गीस। पांचवइया इनिंग म छत्तीसगढ़ के टीम कोनो रन नइ बना सकीस अऊ ये प्रकार महाराष्ट्र ह ये फाइनल मैच 1-0 ले जीत गे। फाइनल मैच म उपविजेता होए के सेती छत्तीसगढ़ ल रजत पदक मिलिस।
