39वां चक्रधर समारोह 07 ले 16 सितंबर तक
रायपुर 01 सितंबर 2024। मुख्यमंत्री श्री विष्णु देव साय ले आज इहां राजधानी रायपुर स्थित निवास म कलेक्टर रायगढ़ श्री कार्तिकेया गोयल अऊ पुलिस अधीक्षक श्री दिव्यांग पटेल ह सौजन्य मुलाकात करके 39वां चक्रधर समारोह म सामिल होए के आमंत्रण दीन। मुख्यमंत्री ह आमंत्रण स्वीकार करके समारोह के सफल आयोजन बर शुभकामना दीन।
मुख्यमंत्री ह कहिन के चक्रधर समारोह रायगढ़ के पहिचान हे। अंतर्राष्ट्रीय अऊ राष्ट्रीय ख्याति प्राप्त कलाकार मन ह समारोह म प्रस्तुति देके एखर गौरव ल बढ़ाए हें। उमन कहिन के रायगढ़ ले मैं सांसद रहेंव अऊ ए आयोजन ल करीब ले देखे हंव। श्री साय ह कहिन के समारोह ले मोर भावनात्मक लगाव घलोक हे। महाराजा चक्रधर ह रायगढ़ ल अमूल्य सांस्कृतिक विरासत सौंपे हे, जेन लगातार समृद्ध होवत हे। समारोह के लोकप्रियता के अंदाज ए बात ले लगाए जा सकत हे के कलाकार अऊ कलाप्रेमी मन ल साल भर ए समारोह के अगोरा रहिथे। मुख्यमंत्री श्री साय ह स्थानीय लोक कलाकार मन ल घलोक समारोह म प्रमुखता के संग सामिल करे ल कहिन।
कलेक्टर श्री कार्तिकेया गोयल ह मुख्यमंत्री ले आयोजन ले जुड़े महत्वपूर्ण जानकारी साझा करिन। उमन बताइन के 10 दिन तक चलइया समारोह में ए साल घलोक बड़े कलाकार मन के प्रस्तुति होही। संगेच समारोह म स्थानीय लोक कलाकार घलोक अपन कला के प्रदर्शन करहीं।
जानबा हे के 39वां चक्रधर समारोह 07 ले 16 सितमबर 2024 तक रायगढ़ जिला मुख्यालय स्थित रामलीला मैदान म आयोजित करे जाही। शुभारंभ समारोह म पद्मश्री हेमा मालिनी नृत्य नाटिका ‘राधा रासबिहारी’ के प्रस्तुति देंहीं अऊ समापन समारोह म डॉ.कुमार विश्वास कविता पाठ करहीं। समारोह के समय रोजेच संझा 6 बजे ले आयोजित सांस्कृतिक संध्या म नामी कलाकार मन ह कई ठन विधा म प्रस्तुति देहीं।
