श्री सी.एल.तिवारी, सहायक संचालक
रायपुर, 06 अक्टूबर 2020। राज्य म चलाए जात मुख्यमंत्री सुपोषण अभियान म जशपुर जिला के 4782 लइका कुपोषण मुक्त होए हें। मुख्यमंत्री सुपोषण अभियान के शुभांरभ जशपुर जिला के मनोरा ब्लॉक म 2 अक्टूबर 2019 के आंगनबाड़ी केन्द्र उपरबस्ती पंचायत भवन म करे गए रहिस। अभियान के उद्देश्य लइका मन म कुपोषण ल कम करे अऊ महिला, किशोरी बालिका मन म एनिमिया ल कम करे बर लक्ष्य निरधारित करे गए रहिस।
मुख्यमंत्री सुपोषण अभियान म कुपोषण ल कम करे के लक्ष्य ल प्राप्त करे बर कई प्रकार के गतिविधि आयोजित करे गए रहिस। सबो हितग्राही मन ल तात जेवन के पाछू हरेक सोमवार, बुधवार, सुकवार के एक अण्डा, हरेक मंगल, बिरसपत अऊ सनिच्चर के एक चिक्की खवाए जात हे। चुने गए गर्भवती, शिशुवती एनिमिक महिला मन ल चिक्की अऊ अण्डा खवाए गीस। ए तरा ले जिला म 4782 कुपोषित लइका मन ल सुपोषित करे गीस।
आंगनबाड़ी कार्यकर्ता, एएनएम मन सरलग गृह भेंट करके व्यक्तिगत साफ-सफाई, स्वास्थ्य जांच करके कृमि नाशक दवा खवाए गीस। आंगनबाड़ी केन्द्र मन म मिलइया पूरक पोषण रेडी टू ईट ल 6 दिन म खवाए के समझाईश दे गीस। खान-पान म विशेष ध्यान दे गीस। जेमां रोजेच रोटी, हरियर साग-भाजी अऊ हफ्ता म तीन दिन मुनगा भाजी लइका मन ल सरलग खवाए के सलाह आंगनबाडी कार्यकर्ता मन लइका मन के माता-पिता ल दे गीस।
सुपोषण अभियान के अंतर्गत आंगनबाड़ी केन्द्र मन म सुपोषण वाटिका तियार करके वोमा लगाए गए साग-भाजी के परयोग घर म करे ल कहे गीस। संग म सबो प्रकार के स्थानीय साग भाजी अऊ खाद्य पदार्थ मन ल संघेर के रकम-रकम के भोजन खात रहे के सलाह देहे गीस। ग्राम स्वास्थ्य स्वच्छता अऊ पोषण दिवस के आयोजन करके हितग्राही मन ल लाभांवित करे बर घलोक कहे गीस। आंगनबाडी कार्यकर्ता मन हितग्राही मन के सरलग टीकाकरण करे गीस अऊ उंकर वजन ले गीस।
